Justin Bieber leh Ed Sheeran thawkdun

Thla hmasa lawkah a mimal hriselna a ngaihpawimawh thu leh music aia chhungkua a dah pawimawh zawk rih thu a sawi a, amaherawhchu tum aia hmaah kan hmu leh zawk dawn si a nih hmel hle. Justin Bieber chuan English singer Ed Sheeran nen an thawhdun thu leh, project an kalpui mek thu a sawi. 

Canadian pop star hian hemi chungchang hi social media kaltlangin a tarlang a, caption-ah '10' tih ringawt a dah. Hei hi fans lamte chuan enge a nih an inrinsiak nasa hle a, a hla title nge ni ang a, ni 10 hnua chhuak tur tih vel an inrinsiak laih laih a ni. 

Thil chiang erawh chu JB-a hian music a luhchilh leh tawh a, hla thar pawh a tichhuak thuai dawn tih hi. Kum 2015-a 'Purpose' a tichhuah hnuah ama puala music video la tichhuak leh lo JB-a hian hla thar a nei  thuai a nih pawhin a mak lo ang.   Hetih rual hian Ed Sheeran nen hian engtiang chiahin nge an thawhdun hriat a ni lo thung.