HSLC topper Rinnungi'n a nu leh pa thu a awih

Kum 16 mi lek a la ni a, chuti chung chuan a nu chaw­­hmeh zuar a ṭhutpui ṭhin. Lalrinnungi d/o Zothan­tluanga, Sihphir Neihbawih hi nu leh pa thu­awih tak a ni a, zirna kawngah pawh mal­sawmna tam tak a dawn phah a ni. 

Rinnungi hi May 2-a Mizoram Board of School Education (MBSE) in High School Leaving Certificate (HSLC) Examination 2019 result a tichhuahah khan topper a ni a, full mark 500-ah mark 486 zet a hmu. Rinnungi hi distinction-ah pass-in Science subject-ah phei chuan full mark a hmu hial. Subject zawng zawngah hian mark 90 a hmu kai vek a, Social Science-ah mark 98 hmuin, mi tam takin subject har an tih, Mathematics-ah mark 97 zet a hmu bawk. English leh Mizo subject-ah pawh a tiṭha hle a, mark 94 leh 97 a hmu phak a ni.

Rinnungi hi Zothantluanga leh Lalhlimpuii fa pali zinga naupang ber a ni a, Sihphira piang leh seilian a ni. Naupang thuawih leh lehkha thiam thei tak a ni a, an veng YMA-in zirlai tiṭha chawimawina an hlan zingah a la tel kim vek!

Nursery aṭanga Class V thlengin Young Learner English School, Sihphir-ah a kal a, Class VI-VIII hi Presbyterian English School, Sihphir-ah a zir leh bawk. Hemi hnu hian a u zir chhuahna St. Joseph Higher Secondary School, Aizawl-ah a kal zui a, a tiṭha berte zingah a tel chho nghal. HSLC result a chhuah meuh chuan Mizoram pumah pakhatna a ni a, St. Joseph Higher Secondary School chuan an hnena zir chhunzawm turin an chelh zui dawn a ni. 

A school kalnate hian duhsakna tinrengin an vur a, a zir zawm lehna turah pawh hian admission leh thil ṭul dangte a thlawnin an tihsak dawn a ni. 

Rinnungi hian Science subject a la zui dawn a, civil service lamah kal a tum. Civil service bakah hian medical line-ah kal a rilruk bawk a, hunin a la hril chho dawn a ni. 

Rinnungi hian zirna lamah chawimawina hrang hrang a lo dawng nual tawh a, school aiawhin Quiz Competition-ah vawi tam a lo feh chhuak tawh bawk. Mizoram Mathe­matics Society-ten nikuma Mathematics Competition an buatsaihah khan a tel bawk a ni. 

HSLC-a pakhatna Rin­nungi hian hun awl a neih changin a nu chawhmeh a zawrhpui ṭhin a, hei hian naupang thuawih tak a nih zia a tilang chiang hle. A nu hian chawhmeh a kharchhawng ṭhin a, eizawnna dang an neih loh avangin a nu hi theihtawpin an unauin an pui ṭhin a ni.