Rosé solo project hmasa ber On The Ground

BLACKPINK member Rosé chuan nimin khan a solo project hmasa ber 'R' a tlangzarh a, hemi rual hian a solo music video hmasa ber 'On The Ground' a tichhuak nghal bawk.

'R' project-ah hian hla pahnih a awm a, music video a tihchhuah thar 'On The Ground'  bakah hian Blackpink-in The Show virtual concert an buatsaih ṭuma solo-a a sak 'Gone'  kha a dah tel bawk. Heng hla pahnihte hi English ve ve a ni.

Khawvel puma thlira ngaih-thlak theih tura 'On The Ground' a tihchhuah hmain YouTube-ah minute 18 vel 'Released' hun hman a ni a, chutah chuan zawhna hrang hrang a chhang hmasa a ni. A hla tihchhuah thar chu nuna zawhna chhanna zawnna lam hawi a nih thute sawiin engkim kan zawn chu keimahniah a awm sa reng a ni tih sak chhuahna hla a ni, a ti.

A hla hmasa 'Gone' kha kum hnih vel liam taa a record daih tawh a nih thu sawiin 'On The Ground' erawh tunhnaia a record chauh a ni thung tih a sawi. Blackpink star hi The Tonight Show Starring Jimmy Kimmel-ah a inlan dawn niin an sawi a, Benedict Cumberbatch leh Madelaine Petsch-te nen an inlan ho dawn nia tarlan a ni.

Auckland, New Zealand-a piang Rosé hi kum sarih mi lek a nih laiin an chhungkuain Melbourne, Australia-ah an pem a, kum 15 mi a nihin YG Entertainment-ah audition neiin hetah hian mi 700 laiin audition an nei a, Rosé hi pakhatna a ni nghe nghe.

A solo album hmasa ber 'R' hi a tlangzarh hma ni liah khan mi nuai li chuangin an pre-order hman a, Korean hmeichhe solo artist zinga album hralh ṭha ber a ni nghal. 'On The Ground' music video pawhin darkar khat pawh tling loah YouTube-ah thlirtu nuai 4.7 chuang a nei hman a ni.