Recording Academy lakah The Weeknd a la lungawi thei lo

'Blinding Lights' hitmaker The Weeknd chuan a label boss-te hnenah Grammy-a a music-te thehlut tawh lo turin a hriattir.

Grammy 2021-a nomination pakhat pawh a hmuh loh avanga lungawi hleithei lo The Weeknd hian Social media lamah pawh Grammy thuneitu lam hi a bei fo tawh a, tunah phei chuan Recording Academy award-ah tel a tum tawh lo mai ni loin, a boycott reng tawh dawn tih a sawi hial tawh a ni.

New York Times hnenah hemi chungchang hi hrilhin,"Ka label-te chu Grammy-a ka music-te an thehluh ka phal tawh dawn lo," a ti. Recording Academy lakah hian Zayn Malik pawh a lungawi lo ve mek bawk a, a hla pakhatmah nomination list-a a lang lo chu a lawm lo hle a, social media lamah na takin a bei ve bawk.

Recording Academy CEO Henry Mason Jr chuan,"Lungawi lo an awm chuan kan zavaiin pawi kan ti ṭhin," tia sawiin, "Kan kaldan phung kan thlak ve reng. Kuminah pawh hian kumdang ang bawkin kan award kalphung hmasawn dan tur ngawrh takin kan ngaihtuah dawn a, nomination review committee chungchang pawh en ṭhat a ni dawn," a ti.