Mahni aia midang dah pawimawhtu Sister Ann Rose Nu Tawng

Myanmar ram buaina a punlun zel a, sipai leh tualchhung mite inkara buaina chhuakah thi pawh an pung zel a, sipai sorkar duh lohna lantirin nitin mai mipui an la pungkhawm hut hut reng mai a ni. Chutiang karah chuan Thawhṭanni khan thil chhinchhiah tlak tak mai a thleng leh tlat mai.

Myitkyina khawpuia Catholic nun Sister Ann Rose Nu Tawng chuan midang tan a nunna hlan huamin, naupangte chhanhimna turin police hmaah ṭhingṭhiin a nunna la zawk mai turin a ngen a, chutia a ngen lai video chu social media-ah darh zuiin mi rilru a hneh hle. A huaisenna avang chuan naupangte chu chhanhimin an awm phah a, chu mihuaisen inpekna chuan ngaihven pawh a hlawh zui hle a ni.

Buddhist tamna ram Myanmar-ah hian February 1 khan sipai chakna hmangin mipui sorkar leh an ram hruaitu Aung San Suu Kyi chu paihthlak a ni a, hemi aṭang hian nitin maiin chanchin duhawm lo tak tak hriat tur a awm zui a, tualchhung mi nunna chan pawh an tam tawh hle.

Chutiang karah chuan Pathian rawngbawltu Catholic nun Sister Ann Rose leh a ṭhiante, nun tho pahnih nen chuan naupangte umtu police-te chu kir turin an ngen a, kum 45 mi Ann Rose phei chuan ṭhingṭhi meuhin a ngen a ni.

Sipai silai hmeh puah vangin a bul lawkah chuan mi pakhat kahhlumin a awm a, tear gas khuin a rawn khuk ṭan bawk a, chutiang boruak rit tak karah chuan a nunna meuh pawh an la hreh lo ang tih hre reng chungin police-te hnenah ṭhingṭhia naupangte nunna chan tura a ngenna chuan khawvel rilru a hneh a, khawvel media lian hrang hrang pawhin uar takin a chanchin an tarlang nghe nghe a ni.

Agence France-Presse (AFP) in an zawhna chhangin Sister Ann Rose Nu Tawng chuan,"Ka ṭhingṭhi a, silaia kap lo turin leh naupangte chu sawisa lo turin ka ngen a, keimah zawk chu min kapa min that zawk mai turin ka ngen a ni.

"Naupangte chu an chiai a, an tlan chhia a, Pathianin naupangte chu a ṭanpuia an chhanhimna tura ṭawngṭai bak tihtheih dang ka nei si lo. Khawvel hi a keh chhe vek nimai hian ka hria a, ka lungngai a, police-te chu ka ngen ta chiam mai a ni," tiin a sawi.

Sister Ann Rose Nu chuan hlau hle mah se naupangte tan chuan a din ngheh a ngai tih sawiin, "Engmah ti loa lo awm mai mai kha ka thei lo a ni, Myanmar pumpui a mangan laia ka mithmuh ngeia khatiang thil a thleng tur kha ka ngai ngam lo a ni," a ti.

February 28 khan Sister Ann Rose Nu Tawng hian security force-te a lo hmachhawn tawh bawk a, midang himna turin ṭhingṭhiin police hmaah a lo ngen tawh bawk a ni. AFP-in an kawmnaah pawh February 28 aṭang kha thi tawh ang maia a inngaih hial thu a sawi.