Avatar > Avengers

James Cameron-a film ropui 'Avatar' chu khawvela film, sum lalut tam ber dinhmunah a ding leh ta a, Avengers: Engdame aiin a sum lakluh a tam tawh zawk. Kum eng emaw zat chhung sum lalut tam ber a nihna dinhmun chu Inrinni aṭang khan a rawn luah leh ta.

Inrinni zingah khan Disney chuan hemi chungchang hi puangin Avatar chu khawvel puma film, sum lalut tam ber a ni leh ta tih an tarlang a, Disney/Marvel Avengers: Endgame-in ro a rel mekna chu a rawn nek chhuah ta a ni. Zirtawpniah khan tuna khawvela film industry hlawk ber ni mek China-ah Avatar hi tlangzarh nawn leh a ni a, chumi hnuah chuan a lo din tawhna ṭhin, khawvela sum lalut tam ber nihna dinhmun chu a rawn nei let leh thei ta a ni.

Avatar hian $tluklehdingawn 2.802 vel lai sum a lalut tawh a, Avengers: Endgame erawh chuan $tld 2.797 a lalut thung.

Avatar hi kum 1994-ah daih tawh khan James Cameron hian a ngaihtuah chhuak tawh a, hma pawh a la ṭan uai uai tawh. 

Khawvela film sum lalut tam ber ni reng ṭhin, Cameron-a film tho, kum 1997-a tlangzarh, Titanic tlangzarh a nih hnu aṭang khan Avatar hi chan ṭan a tum a, mahse khatih hunlai chuan thiamna leh technology a mamawh ang a la awm loh avangin an la siam thei lo niin Cameron chuan a sawi.

Chutichuan, kum 2005 aṭang khan hma a la ṭan leh ta tak tak a, $mtd 237 lai sengin kum 2009 khan a tlangzarh ta a, a hmaa film sum lalut tam ber record siamtu Titanic chu a rawn nek chhuak ta a, khawvela film sum lalut tam ber record a rawn siam ta a ni. Titanic kha kum 12 chhung lai chu khawvela film sum lalut tam ber a ni.

Avatar hian a record siam hi a chelh rei hle a, kum 2019 khan Avengers: Endgame chuan a rawn nek chhuak thei chauh a ni. China-a tlangzarh nawn leh a nih theihna turin $mtd 9 lai an seng leh a, Zirtawpni leh Inrinni-ah ringawt khan China-ah hian $mtd 12.3 lai sum a lalut leh nia tarlan niin, khawvela film sum lalut tam ber dinhmunah hian a rawn inhlangkai leh ta a ni.

Avengers siamtu Marvel Studios lam chuan twitter kaltlangin James Cameron an lawmpui thu an tarlang a, "Producer Jon Landau leh Na’vi Nation zawng zawngte, box office lallukhum in lak let leh avangin kan lawmpui a che u. We love you 3000," tiin post an siam.

Avengers: Endgame directors Anthony leh Joe Russo-te pawhin,"Gauntlet kan pe let leh a che u," tiin an sawi ve bawk.

Avatar hi tunah chuan Disney hnuaia awm a ni ve tawh a, director James Cameron pawh a chhunzawmna siamin a buai hle.

Nakkum December 16 hian Avatar 2 tlangzarh hman tumin a bei ngawrh hle a, December 20, 2024-ah part 3 tlangzarh a tum bawk a, a chhunzawmna siam zel tumin kum 2028-ah chuan part 5 thlenga tlangzarh turin ruahmanna an siam.