Sound Recording copyright hmasa ber SIAR MENGMAWI

H. Lalnunmawia, Aizawl Tlangnuam tlangval hla phuah 'Siar Mengmawi' chu Mizoram aṭanga sound recording lama copyright registration nei hmasa ber a ni ta.

He hla hi Joel Lalbiakkima, Mission Vengthlang hmingin Copyright Office, Govt. of India, New Delhi-ah register a ni. Registration hi Patent Information Centre, Mizoram Science Technology & Innovation Council (MISTIC) te chuan a publisher-te aiawha buaipuiin, July 29, 2020 khan application an thehlut a, endikna hrang hrang a paltlang hnuin March 8, 2021 khan register fel a ni ta a ni. Copyright registration number hi SR-15709/2021 a ni a, a hla hi YouTube lamah ngaihthlak tur a awm bawk.

MISTIC chuan hemi chungchang hi thuchhuah an siamah tarlangin mite kut chhuak thu leh hla a ni emaw, khawl lam thil a ni emaw, humhim sakna dan Intellectual Property Rights (IPR) hrang hrang heng- Patent te, Copyright te, Trade Mark, Design, Geographical Indication, etc. te mipuite hnena hrilhhriat leh hetiang lam kawnga mite ṭanpui hna hi an thawk ṭhin a, pan theih reng an nih thu an tarlang a ni.