Avengers star zingah Robert Downey Jr. a hlawh hnem ber

Tun hnaia film sawi hlawh tak Avengers: Endgame chuan chanchin ngaihnawm dang a neih belh zel a, a changtute hlawh zat thlengin tarlan a ni ta. 

Avengers: Endgame star zing­ah hian American actor Robert Downey Jr. chu sum hlawh chhuak hnem ber a ni a, Scarlett Johansson, Chris Evans leh Chris Hemsworth-te chu a hlawh sang zual an ni bawk. 

Hollywood Reporter chuan tun hnai khan Avengers: End­game changtute hlawh zat hi an tarlang a, ngaihven a hlawh hle. Robert Downey Jr. chu sum lalut hnem ber niin, he film aṭang ringawt hian $mtd 100 vel zet a hlawh. Kum 54 mi 'Iron Man' hian a hlawh hnem fal hle a, Scarlett Johansson, Chris Evans leh Chris Hemsworth ten an pha lo hle. 

Robert Downey Jr. hian Iron Man film-ah khan $mtd 5 vel a hlawh a, Spider-Man: Homecoming-ah khan shooting vawi khatah $mtd 1.66 vel zel lalutin - $mtd 5 vel a lo hlawh chhuak tawh bawk. Nikuma tichhuah Avanegers : Infinity War-ah khan 'Iron Man' hi hlawh hnem ber a ni leh bawk a, $mtd 75 vel zet a hlawh a ni. 

'Captain America' Chris Evans chuan US dollar maktaduai 15-20 vel a hlawh a, Chris Hemsworth 'Thor' chuan hetiang zat vel hi a hlawh bawk. Hmeichhe lam­ah American actress Scarlett Johansson chuan a hlawh hnem ber a, 'Black Widow' sum lakluh hi $mtd 20 vel a ni. Scarlett Johans­son hi Chris Evans leh Chris Hemsworth-te nen an hlawh a inzat vel tihna a ni a, a namai lo hle. 

Brie Larson chuan a hlawh hnem viau bawk a, Scottish actress Karen Gillan leh Gwy­neth Paltrow-te pawhin an hlawh ṭha thawkhat hle. Avengers : Endgame-ah hian Hollywood star rual an inlan a, Tom Holland, Chris Pratt, Bradley Cooper, Tom Hiddleston, Vin Diesel leh Dave Bautista thlengin hmuh tur an awm. He film siam nan hian US dollar vaibelchhe 35 chuang zet an hmang a ni. 

Avengers: Endgame hi April thla tawp lam khan release a ni a, khawvel hmun hrang hrang aṭangin $ld 1.2 chuang zet a lalut leh der tawh a ni.