Ṭhazual Fakna -ah A hmun ngaiah Zela Chuaungo

'Lunghlu' tih hla thiam tak maia satu Zela Chuaungo chuan Ṭhazual Fakna chart-ah a dinhmun ngai, No.1 a luah leh ta. A záwna dinhmun sang ber luah hi a namai lo hle a, zaithiam tam takin an tih theih loh a ni. Tun ṭumah hian Stacy VL Muanpuii leh Mawitei Ralte-te chu top 3-ah an lang a, H. Lalremruati leh Andrew K. Lalchhandama-te chu top 5-ah an lang ve leh bawk. 

'Lunghlu' tih hla hmang hian Music Domain Mizoram (MDM) hla inphuahsiakah lawmman pakhatna a lo la tawh a, a phuahtu Zela Chuango hian a hlawh­tlinpui tak zet. 

Luangmual tlang­val Zela Chuaungo hian hla phuah bakah zai pawh a thiam tih lantirin, 'Lunghlu' music video hi a tichhuak a, thlan a hlawh hle. Ṭhazual chart-ah a vawi khat nan No.1 a hauh hnuah a zawnin dinhmun sang ber a luah zui zat a, mi bik a nih zia a tarlang nawn. 

Zela Chuaungo hian March thla khan a music video hma­sa ber hi a tichhuak chauh a, Ṭhazual chart-ah erawh a mikhual tawh lo hle. Music track hi JH Lungmuana siam sak a ni a, recording hi A-16 Recording Studio kutchhuak a ni. 

Tun ṭumah hian Stacy VL Muanpui chuan 'I rinawm ropui zia' tih hla hmangin pahnihna a hauh a, chart hmasa lamah khan pangana a ni. Stacy hian dinhmun sang ber luah turin hmabak a nei eng hle a, a tum ram a thleng a nih pawhin a mak lo ang. 

'Lalpa min vengtu' tih hla hmangin Mawitei Ralte chuan pathumna a luah ve thung a, Champhai nula H. Lalremruati  leh Mizo Idol star Andrew K. Lalchhandama ten an dawt. Rem­ruati hian a hla thulkhung 'Mawi tawp berin' tih hla hmangin Ṭhazual chart-ah pakhatna hial a lo kai tawh a, Darlawn tlangval Andrew pawhin 'Zalenna dar' hmangin No.1 a lo hauh tawh bawk. 

Praise On aṭanga Zoram mipui­in kan hmelhriat R. Lalrin­mawii (Arini), Cindy Lalthanpui (Cindy) leh Zorinsanga Sailo (Zorina) te zaithiam zia sawi nawn a ngai lo. An pathum hian tun hnai khan music video 'Nunna thar' an tichhuak thar a, Ṭhazual chart-ah an inlar nghal. 

He hla hi Fela irawm chhuak a ni a, Praise On 2016 trio-te hian an sa nalh hle. Music track hi Kima Chhangte siamsak a ni a, belhchian a dawl leh pek hle. 'Nunna thar' tih hla hi ngaihthlak a man hlain thlan pawh a hlawh hle a, Ṭhazual chart-ah dinhmun sang ber an kai a nih pawhin a mak lo ang.