MCS Topper Dr Laldinsangi Thla hnih chhung ngawrh takin a inbuatsaih

Mizoram Public Service Commission (MPSC) chuan May 2 khan Mizoram Civil Service (MCS) Junior Grade exam result a tichhuak a, Mission Vengthlang nula Dr Laldinsangi chu topper a ni. 

Dinsangi hi Civil Service exam-a tling tur hian a thawkrim hle a, hun awl a neih apiangah lehkha a zir chawt a, thla hnih vel chhung chu mutmu pawh a tuah ṭha meuh lo.

Civil Service exam-ah Arts subject la te tan chance a ṭha tih a ni ṭhin a, a dikna chen pawh a awm. Chutih rual chuan mi bik tan erawh kawng zau takin a inhawng tih a lang a, tun ṭuma MCS topper Dinsangi pawh optional subject thlan tur zingah a master-na subject thlan tur awm lo a - a ti ṭha ber erawh a ni tho!

Dinsangi hian main exam-ah khan optional subject atan Veterinary Sciences and Animal Husbandry a thlang a, heti chunga topper a ni thei hian mi bik a nih zia a tichiang hle. 

Mizoram University-a Department of Biotechnology-ah Guest Lecturer in a awm a, kum hnih vel a thawk tawh. Midang zirtir ngai bawk, mahni inzir ngai bawk hi a namai lo hle ang tih a rinawm. 

A vawi khat nan Civil Service exam chu a hmachhawn ta a, topper a ni hial. Mi tam takin vawi eng emaw zat an exam hnuah pawh an la inziak tling hlei thei lo a ni a, hetih kara vawi khat exam-naa topper nih hi thil namai lo tak a ni. Hlawhtlinna chang tur hian a thawkrim hle tih erawh hai rual a ni lo a, lirthei a chuan lai pawha theihtawpa inbuatsaih  ṭhin - a chhiar theih loh pawha ngaihthlak lama ṭuan ṭhin a nihna hi a fakawm hle. 

Dr Laldinsangi hian zirna lamah pawh hlawhtlinna a lo chang tawh ṭhin a, Class X-ah Mizoram pumah pakuana (9th Rank) niin, Class XII-ah pawh Biology subject-ah a tih ṭhat avangin Department of Biotechnology, Govt. of India chuan award an lo hlan tawh bawk. 

Biotechnology subject chu a tuina niin, St. Mary's College, Hyderabad aṭangin B.Sc. (Biotechnology) a zo a, University of Hyderabad aṭangin M.Sc (Animal Biotechnology) a zawh hnuah, Animal Science-ah Doctor of Philosophy (Ph.D) a zo leh bawk.