Zaninah Man of The World India grand finale
Man of The World-a India aiawha tel tur zawnna Man of The World India grand finale chu zaninah neih a ni dawn a, dar 6:30 vel aṭangin Facebook page Missosology-ah live a pek chhuah a ni ang.
Grand finale-ah hian Mizoram aṭangin Mister India Mizoram 2019, Jonathan Lalmuanpuia Thangeo leh 1st runner up Eddie Zaithan-mawia te an inlan dawn a ni. Man of The World India-ah hian inelna hrang hrang -Tuxedo Round, National Costume Round, Fitness Round, Swimwear Competition leh Talent Round te a awm dawn a, hengte aṭang hian sub-title sem a ni ang. Best in National Costume leh Mr. Talented title latute bakah, People's Choice Award la tuten top 15 direct entry an hmu dawn a ni.
Grand finale zana Jonathan leh Eddie-a te suit hak tur hi designer Buanga Chhangte-in a thlawnin a tumsak. Jonathan-a'n National Costume Round-a a hak tur hi Mahlui Pearl-in a tum sak dawn a, Heritage Mizoram ten an thawmhnaw hak tur ṭhenkhat hi an tum sak bawk.
Man of The World India 2019-ah hian India ram hmun hrang hrang aṭangin finalist 30 an awm a, Grand Winner hian July thlaa Philippines-a Man of The World International-ah India ai a awh dawn a ni. Top 5 chinte hian International Male Pageant dangahte India an represent dawn bawk a ni.