Box Office-ah Titanic record khumtu Avengers: Endgame

Film chhuak tawh zinga ropui ber ang hiala an sawi ṭhin chu 'Titanic' a ni a, hun eng emaw chen chu khawvela film hlawhtling ber din hmun a lo luah tawh reng a ni. Amaherawhchu tun hnaiah film industry-in nasa takin hma a sawn a, film hlawhtling ber pawh sawi harsa tak a ni. 

Tehna awlsam ber pakhat chu an sum lakluh zat a ni a, heta ṭanga teh hi chuan 'Avatar' a chungnung ber. Avatar hnuaiah hian Titanic a awm ṭhin a, tunah erawh Avengers: Endgame hun a her chhuak ve leh ta. Avengers: Endgame hian tlangzarh aṭanga kar hnih pawh a liam hmain $tld 2.2 zet a lalut a, ni rei lote chhungin khawvela film hlawhtling berte zingah a inhlangkai a ni. 

Avengers: Endgame hi April 26 khan release a ni a, a tir aṭang phatin record a siam chho nghal zat zat. He fantasy/sci-fi film hi $tld 1 sum lalut tura hun mamawh rei lo ber a ni a, kar hnih pawh a liam hmain $tld 2 chuang lalutin record ropui tak a siam zui. 

Kum 1997-a khawvel deng­chhuak dawt thei khawpa film lar 'Titanic' a khum miau avangin a record hi a namailo hle. James Cameron kutchhuak Titanic bakah hian sum lalut hnem zual Star Wars: The Force Awakens leh Avengers: Infinity War-te pawh a khum bawk. 

Hetih lai hian khawvela film hlawhtling ber chu Avatar a la ni reng a, an inthlauhna erawh a tam lo hle. Kum 2009-a tihchhuah Avatar hian $tld 2.7 a lalut a, hei hi Avengers: Endgame hian a hnaih hle. Khawvel hmun hrang hrang aṭanga a sum lakluh dan en chuan ni tam pawh a vei hmain a khum theih a rinawm. 

Box Office-ah 

Hollywood star rual channa Avengers: Endgame hian hneh takin a zawnin Box Office-ah ro a rel a, a sum lakluh zat chu $mtd 145.8 a ni. Kar hmasa khan $mtd 357.1 zet lalutin dinhmun sang ber a lo luah tawh bawk. North America aṭanga a lakluh ringawt hi $mtd 500 chuang zet a ni tawh a, India ram aṭang ringawt pawhin vaibelchhe 300 chuang a lalut tawh a ni. 

Tun ṭumah hian The Intruder chu sum lalut tam pahnihna a ni a, Long Shot leh Uglydolls-te'n an dawt. Captain Marvel chu top 5-ah a lang ve leh bawk a, a sum lakluh zat chu $mtd 4.3 a ni. Kristian movie Break­through chu sum thawk chhuak hnem zual zingah a tel a, The Curse of La Llorona leh Shazam! te a khum a ni. Little leh Dumbo-te chu top 10-ah an lang bawk.

1.    Avatar $tld 2.7

2.    Avengers: Endgame $tld 2.2

3.    Titanic $tld 2.1

4.    Star Wars: 

    The Force Awakens $tld 2.1

5.    Avengers: Infinity War $tld 2