Met Gala 2019 Milar an fuan khawm

New York City-a Metro­politan Museum of Art's Costume Institute ṭanpuina tura kum tina buatsaih ṭhin, Met Gala chu nimin khan neih a ni leh ta. He hunah hian milar ṭhahnem tak an fuan khawm a, an incheinate chu ennawm a tling!

Khawvel huapa zai­thiam lar ber ber bakah, Hollywood leh Bollywood star eng emaw zat an inlan. Fashion event ngaihven hlawh tak Met Gala-ah hian an theme chu 'Camp: Notes on Fashion' a ni. 

Met Gala 2019-ah hian zaithiam lar ber ber - Katy Perry, Lady Gaga, Nicki Minaj, Cardi B, Harry Styles, Kacey Musgraves, Kanye West, Janelle Monae, Dua Lipa leh Celine Dion-te chu inlan zingah an tel a, mit an tlung hle. 

Katy Perry incheina chuan mit a la hle a, thla­latute pawhin an bawr nasa hle. A thuam inbel hi Italian luxury fashion house lar tak Moschino kut chhuak a ni a, kum 34 mi lai ni ve tawh American singer hian a mawipui hle a ni. 

Lady Gaga chuan a ze ngai chhuah lehin maksak takin a inchei a, Nicki Minaj leh Cardi B-te incheina a dangdai viau bawk. Lady Gaga hi Brandon Maxwell chuan a chei a, show chhung hian ṭum li zet a inthlak hman! Cardi B chuan Thom Browne gown a ha a, a siam nan hian ar hmul 30,000 zet hman a nih bakah, mi 35-in darkar 2,000 chhung zet an buaipui a ni!

British singer Dua Lipa chu mipui mit fukna ber pakhat a ni bawk a, a vawi khat inlannaah hian a bialpa Isaac Carew chuan a ṭawiawm a ni. 

Fashion event-ah chuan an tel loin a kim lo emaw tih mai tur a ni a, Met Gala-ah pawh Kardashian-te an langsar leh hle. Kim Kardashian chuan Maison Mugler corset a ha a, Kylie Jenner leh Kendall Jenner-te an mawi viau bawk. Kim Kardashian hi Kayne West chuan a ṭawiawm a, Kylie Jenner kiangah Travis Scott a ding bawk. 

Film star zingah Ameri­can actor Jared Leto chu a che dangdai hle a, show-ah hian ama hmel lanna lubung a lek chhuak a ni. Jared Leto hian Gucci gown sen a ha a, red carpet-ah bawrtu a ngah hle. Model zingah Emily Ratajkowski leh Ashley Graham-te chu an langsar a, nupa tuak thar Joe Jonas leh Sophie Turner te chuan mit an la hle bawk. 

Bollywood star Priyan­ka Chopra leh Deepika Padukone te chu Met Gala tihlawhtlingtu zingah an tel a, an duai lo hle. Priyanka hian afro curls a inbel a, a pasal Nick Jonas chuan pristine suit var inbelin a ṭawiawm a ni. Priyanka hi Met Gala-a a inlan ṭum thumna a ni tawh a, Nick Jonas nen hian a hma pawhin an lo inlan dun tawh a ni.