RATM 2020 Coachella Festival-ah inlan dawn
Rage Against the Machine (RATM) fan-te tan chuan thu lawmawm a ni ngei ang. RATM chuan thla hmasa lawk khan reunion an neih dawn thu an puan hnuah 2020 Coachella Valley Music and Arts Festival-ah an perform dawn thu tihchian a ni leh ta.
Music festival lian Coachella Festival hi April 10-12 leh April 17-19 hian neih a ni dawn a, RATM an inlan dawn tih a chiang tawh niin khawtlang media-te chuan an tarlang. Anni bakah hian rock band eng emaw zat inlan tur an awm bawk a, chung zingah chuan Thom Yorke, Yungblud, Run the Jewels, King Gizzard and the Lizard Wizard, Code Orange, Pup leh Emo Nite-te pawh an tel.
Travis Scott leh Frank Ocean-te pawh an perform dawn tih a chiang tawh nia tarlan ni bawkin, My Chemical Romance pawh an perform dawn tih thawm a awm bawk. Lana Del Rey a inlan dawn tih a chiang tawh a, Bigbang pawh an inlan dawn bawk a, RATM, Travis Scott leh Fank Ocean-te hi headliner tur an ni ang. Coachella Festival hi 1999 aṭang khan buatsaih ṭan a ni a, kumtin hman chhoh zui niin khawvela music festival ngaihhlut ber leh lar ber zinga mi a ni.