Spain PM-in sorkar thar siam dan ngaihtuah ṭan

Spain Prime Minister Pedro Sanchez chuan sorkar thar siam dan tur ngaihtuahin political party dang hruaitute inbiakna a neihpui ṭan. 

April 28-a inthlanpui an neihah khan PM Sanchez-a party, Socialist Party (PSOE) chuan seat 350 awmah 123 lain seat la hnem ber a ni a, mahse party mala sorkarna an siam theih loh avangin ṭangrual sorkar siampui tur an zawng a ni. Sorkar siam tur hian seat 176 neih phak a ngai a ni.

Thawhṭanni khan Sanchez hian right-wing People's Party (PP) hruaitu Pablo Casado chu Madrid khaw daia a official resi­dence, Palacio de la Moncloa-ah a kawm. Parliament-a seat 66 nei, Casado chuan meeting zawha chanchin thar lakhawmtute a kawmnaah, prime minister atana Sanchez dah chu an thlawp ve thei lo tih a sawi. Eptu chak tak leh rintlak tak nih an tum zawk tih a sawi. 

Sanchez hian centre-right Ciudadanos party hruaitu Albert Rivera leh left-wing Unidas Podemos party hruaitu Pablo Iglesias-te a hmu leh dawn a ni. Hetih lai hian seat 24 nei, extreme right-wing Vox party erawh chu inbiakna neihpui a tum zingah an tel lo thung.