Grammy 2021-ah Beyoncé leh Taylor Swift-te'n record an siam

63rd Annual Grammy Awards chu  Los Angeles Convention Center, Los Angeles leh a chhehvelah Pathianni zanah (India ram huna nimin zing) khan sem a ni ta a, South African comedian Trevor Noah chu host niin nomination hmu tam ber Beyoncé tan zan ropui a ni a, award pali lai a hum haw leh avangin khawvela hmeichhia, Grammy award dawng hnem ber record a siam.

Taylor Swift tan pawh zan duhawm tak a ni a, Album of The Year award a dawn leh avangin hmeichhe artist zinga ṭum thum Grammy Album of The Year award dawng thei awm chhun a ni.

Grammy 2021-ah hian Beyoncé chuan 'Black Parade' hmangin Best R&B Performance award a dawng. Megan thee Stallion a thawhpuina 'Savage' chu Best Rap Performance leh Best Rap Song atan thlan a ni a, Saint Jhn &Wizkid leh Blue Ivy Carter-te nena an tihchhuah 'Brown Skin Girl' chu Best Music Video-ah thlan a ni bawk. 

Hengte avang hian Beyoncé chuan Grammy award 28 lai a dawng ta! bluegrass singer Alison Krauss-in record a lo siam tawh chu a khum ta a ni. Taylor Swift pawhin 'Folklore' hmangin Album of The Year award a dawng a, kum 2010-ah khan 'Fearless' hmangin he award hi a lo dawng tawh a, kum 2016-ah khan '1989' hmangin he award hi a lo dawng tawh bawk. Frank Sinatra, Paul Simon leh Stevie Wonder-te chiah he dinhmunah hian an la ding a, chumite bulah chuan Taylor Swift hi a inlangkai ve ta.

Award ngaihhlut Record of The Year chu nikum lama che ṭha tak Billie Eilish-i'n  'Everything I Wanted' hmangin a dawng. H.E.R. 'I Can't Breathe' chu Song of The Year atan thlan a ni a, Megan Thee Stallion chuan Best New Artist award a hum haw thung.

Lady Gaga leh Ariana Grande sak 'Rain on Me' chu Best Pop Duo/Group Performance-ah thlan a ni a, Dua Lipa album 'Future Nostalgia' chu Best Pop Vocal Album-ah puan a ni. Best Rock Album-ah The Strokes 'The New Abnormal' chu thlan niin 'Wildcard' Miranda Lambert chu Best Country Album-ah thlan a ni bawk.

Dua Lipa performance a hmuhnawm a, hla pahnih 'Don't Stop Now' leh 'Levitating' a remix bakah 'Future Nostalgia' music-ah a lam bawk. Taylor Swift, Jack Antonoff leh Aaron Dessner-te perform ho an hmuhnawm a, a ngaihnawm bawk.

Little Richard, Kenny Rogers, John Prine leh Gerry Marsden-te tribute-ah zaithiam lar tak tak Silk Sonic, Lionel Richie, Brandi Carlile, Brittany Howard leh Chris Martin-te an zai a, Post Malone chuan 'Hollywood's Bleeding' a sa bawk a ni.

BTS chuan 'Dynamite' an sa a, Maren Morris leh John Mayer-te chuan 'The Bones' an sa dun a, Mayer-a guitar khawih a mawi lehpek hle. Billie Eilish leh Finneas, Harry Styles leh Doja Cat-te pawh perform zingah an tel a ni.

-    Beyoncé chu nomination hmu tam ber niin category pakuaah nomination a hmu.

-    Award dawng hnem ber pawh Beyoncé bawk niin pali a dawng.

-    Hmeichhe zinga Grammy Award dawng tam ber record Beyoncé chuan a siam a, 28 a dawng tawh.

-    Taylor Swift chu hmeichhe zinga Album of The Year award vawi thum dawng thei awmchhun a ni.

-    Grammy 2021 hi  January 31, 2021-a sem tur kha ni mah se hripui leng vangin Pathianni khan an sem.