Mystical Mizoram Ṭhazual Lengzem-ah O! Zorinzuali Khiangte a chungnung ber

Mystical Mizoram Ṭhazual Lengzem chart-ah Zorinzuali Khiangte chuan chuan a hla thar ber 'O' chu pakhatna a nihpui. 

Zorini Khiangte tan hian ṭhazual chart topper nih hi thil thar a ni hran tawh lo a, chutihrualin 'O' hi kumina chart topper a nihpui hmasak ber a ni. Tunhnaia hla thar tichhuak tam lutuk lo Zorini hian 'O' hi nikum October thla tawp dawn lamah khan a tichhuak a, music video hmuhnawm tak nen he hla hi rawn chhawp chhuakin chart topper a ni pawh hi a mak lo hle. Hemi hnuah hian official music video dang a la tichhuak leh lo thung.

He hla hian hlutna deuh a nei a, a chhan chu fam ta Michael M Sailo aw ngaihthlak tur a awm tel a ni. A tlangzarh dawn khan Zorini chuan Michael-a kut hnu hla a neih hnuhnun ber a nih tawh thu leh, recording pawh a buaipui sak a nih thu Vanglaini hrilhin a ngaihlu hle tih a lo sawi lang tawh nghe nghe.

Tunlai Mizo lengzem singer zinga huhang ngah ber pawl Rebecca Lallawmsangi 'Dam dam' chu pathumna aṭangin pahnihnaah a rawn inhlangkai ta. He hla hi a hit hle a, YouTube-a pawh thlira ngaithlatu maktaduai chuang fe an awm tawh. Chart leha a dinhmun tur hriat a chakawm tawh hle a ni.

'Saw nu saw a hmelṭha' hitmaker Keimah Senes, Tlangval Tlumtea ft. Lil Me te hla pahnihna 'Mizo nula' chu pathumna a ni. Palina chu Rempuii Ralte 'Tawnmang Ram' niin PC Lalnunpuii chuan 'Engtin awm zel ang i maw' hmangin top 5 a khar.

Ṭhazual lengzem chart top 10-ah hian David Zawma, TC Tetea leh Ronald Zothantluanga te pawh an lang a ni.