Tunlai lengzem hla lar 'Thinlung khawngaihthlak ' Francis-a'n music video a siam dawn

A hming pum pawh hre lo a tam zawk kan nih mek laiin, a hla erawh tunlai lengzem hla lar ber tihngam a ni lawi si! Tunah erawh chanchin lawmawm tak hriat tur a awm ta - Francis Lallawmkima'n 'Thinlung khawngaihthlak' music video a siam dawn. 

He thu hian mi tam tak tan lawmna a thlen ngei ang tih a rinawm a, nghakhlel fe fe pawh an kat nuk ngei ang. 'Thinlung khawngaihthlak' tih hla hian ngaihthlak a hlawh em em a, a satu erawh tunge a nih hre lo mi tam tak an la awm. Francis Lallawmkima hian music video a la siam miau lo a, mipui hmaah lah a perform hmuh tur a la awm meuh lo. Heti chung hian Zoram dung leh vang a deng chuak thei a, a zai thiam em avangin a chanchin hian ngaihven a hlawh chho mek. 

Ramhlun South tlangval Francis-a hi zai lama tui tak a ni a, tawn hriat pawh a nei nual tawh. Chutih rual chuan chhuan tur erawh a nei tam lo hle - sap hla sak hmanga intihsiakna The Highland Voice-a an hnawl hnu ve mai kha a ni! Amaherawhchu amaha theihna a hrechiang a, a beidawng duh lo.

Hmanni lawka an hnawl hnu khan YouTube kaltlangin Zo rimawi khawvel a dengchhuak zui a, ṭhalaite zingah phei chuan a tlana hle. 'Thinlung khawngaihthlak' music track hi May 5 khan YouTube-ah upload a ni a, viewer nuai hnih chuang an awm der tawh.

Francis-a hian music video a la nei lo a ni satliah lo - siam tumna pawh a la nei ngai lo. Tunah erawh mipui hmuh leh ngaihthlak chak ber mai 'Thinlung khawngaihthlak' tih hla a neih tawh avangin siam lo thei lo dinhmunah a ding mek. 

A music video hmasa ber tur hi a buaipui mek a, June thla velah chuan shooting ṭan hman an tum. Francis-a chuan, "Music track leh recording-ah chuan buaina awm lo turah kan ngai a, video siam tura hual deuh pawh kan nei tawh. Tunah thut thut kan ṭan lo a nih pawhin thla thar lamah chuan kan inpeih hman ka beisei," tiin, Vanglaini a hrilh. 

'Thinlung khawngaih­thlak' tih hla hi Ramsanga leh Ramenga (Triau Trackx) te phuah a ni a, a thluk pawh Mizo rilrem zawng tak a ni. Recording hi S&M Digital, Champhai kutchhuak a ni thung. Francis Lallawmkima hian a ṭhiante nen Zotunes dinin, event-te pawh an lo buatsaih tawh ṭhin. Chungah pawh chuan vawi tam a lo zai tawh a, tunah chuan a zai thiam zia mipuiin an hre tawh. A music video tihchhuah hun tur hi sawi lawk ni lo mah se, a chhuak har vakin a rinawm lo.