Dawrpui Multipurpose Centre-ah Edu Options 2019

East India-a education fair lian leh ngaihven hlawh berte zinga mi chuan Aizawl a lo lut leh dawn ta! 17th Edu-Options 2019 chu Lynchpin leh Zalen newspaper ṭangkawp chuan May 14 & 15 hian Dawrpui Multipurpose Centre (Near Aizawl Civil Hospital)-ah an buatsaih leh dawn a, chawhma dar 11:00 aṭanga tlai dar 5:00 thleng hawn ṭhin a ni ang. 

Edu-Options hi zirlai tam takin an lo chhawr ṭangkai tawh ṭhin a, kuminah pawh hian Class 11 leh 12 zirlaite tan chuan chhim ngei ngei chi a ni a - result nghak mekte tan phei chuan hmaih phal chi a ni lo. Edu-Options hian a tum ber chu zirlai leh zirna-ina thawkte hmai­chhanah indawr tir a, zirlaite'n an hma hun atana zawh duh an neihte zawhna hun siam sak a, kawng inkawhhmuh theihna hun siamsak a ni. He hun hi zirlaite tan chuan a hlu em em a, an kal zelna tur atana inhaikuakna remchang tak a ni. 

Kumin hian India ram chhunga College leh University 35 vel tel tura beisei an ni a, free counseling an pe thei dawn bawk. Zirlaite tana an hma huna hriat tur pawimawh leh ṭangkai tur tam tak chhawpchhuah tum a ni a, personality test thlengin neih tum a ni. Edu Options-ah hian nitin quiz leh lucky draw a awm dawn bawk a, smart phone, pen drive leh earphone-te a man theih dawn a ni. Luh man a awm dawn lo a, a duh apiang tan chhim theih a ni.