JB-a leh Ed Sheeran hla thar tur 'I Don't Care'

Hmanni lawkah social media kaltlangin an thawhdun thu an puang a, music ngainatute ngaihven a hlawh hle a nih kha. Candian singer Justin Bieber leh British singer Ed Sheeran-te chuan hla thar 'I Don't Care' an peihfel thu an puang leh ta a, hmuh tur a awm thuai a rinawm. 

Hemi chungchang hi social media lamah tarlangin, fan-te chu dawhthei taka lo nghak turin an chah. Chutih rual chuan nghah rei erawh a ngai dawn lo a nih hmel hle a, May 10, Zirtawpni hian an tichhuak dawn tih khawthlang media-te chuan an tarlang. 

Ed Sheeran hian an hla title hi Thawhlehni khan a lo puangzar tawh a, fans lam pawh an phur hle. JB-a nena an thlalak pawh social media lamah hmuh tur a tam hle a, an hla thar hi a 'hit' viau a nih pawhin a mak lo ang. Justin Bieber leh Ed Sheeran-te hi 'Love Yourself'-ah khan an lo thawkdun tawh bawk a, a hla thu hi American record producer, Benny Blanco-te nen an pathuma an phuah khawm a ni.