HONTRADE INTERNATIONAL ṬHAZUAL LENGZEM Dj Lalvenhimi 'Ka dawn lungruk' a mawi ber

Hontrade International Ṭhazual Fakna Chart-ah Dj Lalvenhimi 'Ka dawn lungruk' chu No. 1 a ni a, Jaui 'Lo hnai la' chu pahnihna niin Teawmi 'Facebook' chu pathumna a ni bawk.

Ṭhazual chart-a a hla eng emaw zat No. 1 lo nihpui tawhtu Dj Lalvenhimi 'Ka dawn lungruk' chu tun chart-ah pawh hian pakhatna a ni leh.

'Ka dawn lungruk' hi  Lalrindiki (Delta sound) phuah niin a pasal CL Para tana a phuah a ni a, music video hmuhnawm tak hi YouTube lamah chuan mi nuai 1.5 chuang zetin an thlir tawh. A hla thluk mawi tak hi Bruce Pachuau siam a ni a, Video hmuhnawm tak mai hi photographer lar tak Jeremy Hauhnar direct niin a hmuhnawm bawka en leh ngaihthlak a manhla hle.

Nikum November thla laihawl vela a tihchhuah kha a ni a, tihchhuah a nih hnu lawk aṭang khan Ṭhazual chart-ah hian lang nghalin, hma a sawn chak hle a, thla hnih a liam meuh chuan pakhatna a ni thei ta a ni.

Chart hmasaa pakhatna Jaui 'Lo hnai la' chu pahnihna a ni ve thung a, Teawmi 'Facebook' chu pangana aṭangin pathumnaah a rawn invawrh bawk. 'Facebook' hian chart-ah hma a sawn chak hle a, a dinhmun a rawn sawh nghet zel a ni.

RPA & Rinhlui Pialtu 'Lokir leh mai rawh' pawhin hma a sawn zel a, palinaah a rawn invawrh tawh a, anni pawh hi an dinhmun a ṭha sawt hle. Chart hmasaa pahnihna leh No.1 dinhmunte pawh lo luah tawhtu Manuna 'Ka hmangaih vang' chu panganaah awm ve thungin Top 5 khartuah a ṭang a ni.