Duke and Duchess of Sussex fapa hming Archie Harrison Mountbatten-Windsor

Prince Harry leh Duchess Meghan Markle-te chuan an fa hmasa ber chu vantlang hmuhah an pholang ta a, a hming atan Archie Harrison Mountbatten-Windsor sak a nih thu an puang bawk. 

Duke and Duchess of Sussex-te hian May 6, Thawhṭanni zing khan fapa hi an nei a, lawmpuitu pawh an ngah hle. An fa tir hi hun eng emaw tichhung pholan loha a a awm hnuah, a nu leh pate ngeiin mipui hmuhah an pawm lang ta a ni. 

Prince Harry chuan Archie Harrison Mountbat­ten-Windsor hi St George Hall aṭangin a pawm chhuak a, Meghan Markle pawhin a dam ṭha tih lantirin mipui hmaah a inlan. Markle chuan, "Kan lo suangtuah ṭhin chu a takin a thleng ta," tiin lawmthu a sawi a, Prince Harry pawh a hmelah a hlim hle tih a lang. 

Archie Mount­batten-Windsor-a 'Archie' tih hi 'genuine' tihna a ni a, 'bold' emaw 'brave' tihna a ni bawk. He thumal hi Britain-ah aiin US-ah a lar zawk a, Archibald aṭanga kaihtawi a ni. 

Archie hi Queen Elizabeth II tuchhuan pariatna a ni a, Earl of Dumbarton leh Lord Archie Mountbatten-Windsor title nei thei a ni. Amaherawhchu a nu leh pate hian heng title hi an put tir dawn lo a - Master Archie Mountbatten-Windsor tih a ni ang. Master Archie Mountbatten-Wind­sor hi British lalṭhuthleng luah theitu tur pasarihna a ni. 

Duke and Duchess of Sussex-te hian khawvel hmun hrang hrang aṭangin lawmpuina an dawng hnem hle a, chung zingah chuan Markle-i ṭhian hnai tak Priyanka Chopra pawh a tel. 

Prince William chuan a unaupa Prince Harry chu duhsakna hlanin, Markle a lawmpui thu a sawi bawk. Prince of Wales pawhin Duke and Duchess of Sussex-te a lawmpui thu a lo sawi tawh a, Meghan Markle-i nu Doria Ragland chuan a tupa thar hian a tihlim hle tih a sawi. Queen leh Duke of Edinburgh te pawhin an tupa thar hi an tlawh tawh bawk. 

British lal chhungkua hian an chhungkaw thlalak thar ber, Master Archie Mount­batten-Windsor lan telna chu St. George Hall, Windsor Castle-ah an tar thar bawk a ni.