May 31-ah Spice Girls 'Greatest Hits'

Reunion Tour nei tura inbuat­saih mek Spice Girls-te chuan boruak vuak hot nan an hla 'hit' zual dahkhawmna 'Greatest Hits' chu May 31 hian an release dawn. 

English pop girl group hian Greatest Hits an tihchhuah tur thu hi Nilaini khan an puang a, fans lam pawh an phur tawh hle. Greatest Hits-ah hian hla 15 a awm dawn a, chung zingah chuan - Wannabe, Say You'll Be There, Mama, Spice Up Your Life, Viva Forever leh Holler-te a tel a, Voodoo leh Goodbye-te pawh an hmaih loh tur zinga mi an ni. 

English legendary girl group hian May 24 hian Croke Park Stadium, Dublin, Ireland-ah Reunion Tour hi an kick-off tawh dawn a, Europe hmun hrang hrangah show an nei dawn a ni. UK-ah ringawt pawh concert ṭum 13 vel an nei ang.   

Spice Girls Reunion Tour hian hun rei tak ata tawh thawm a lo nei tawh ṭhin a, a hun a thleng dawn ta a ni. Melanie Brown, Melanie Chisholm, Geri Horner leh Emma Bunton-te perform hmuh a chakawm tawh a, chutih rual chuan Victoria Beckham tel lo tur erawh channa nasa tak a tling.