No Time to Die Tlangzarh hun tikhawtlai
James Bond film thar ber tur No Time to Die chu April thla tira tlangzarh turin ruahmanna siam vek tawh mah se coronavirus darh zel vanga fan-te'n tlangzarh hun tikhawtlai tura an ngen hnuah November thlaah tlangzarh a ni dawn.
No Time to Die hi James Bond film 25-na tur a ni tawh a, Daniel Craig-a 007 a nih tawp berna tur a ni bawk. April thla aṭang hi chuan theatre hrang hrangah tihchhuah hman tum a ni a, mahse tunkar tirah khan James Bond fan-te chuan MGM leh Universal hnenah ngenna thlenin Covid-19 hrileng darh mek chu thunun a nih hma chuan tlangzarh lo turin an ti a ni.
James Bond twitter account chuan thuchhuah siamin, "MGM, Universal leh Bond producer- Michael G. Wilson leh Barbara Broccoli-te chuan uluk taka an ngaihtuah hnuah leh khawvel hmun hrang hranga theatrical market-te an zirchian hnuah Nilaini khan No Time to Die chu November 2020-ah tlangzarh a ni dawn thu an puang," tiin an tweet. November 12-ah UK-ah tlangzarh a ni phawt anga, chumi hnuah khawvel hmun hrang hrangah tlangzarh chhunzawm a ni dawn a, US-ah chuan November 25-ah tlangzarh a ni ang.
James Bond-in kum 67 a tling dawn
April 13, 1953 khan British author Ian Fleming chuan Casino Royale tih lehkhabu a tlangzarh a, heihi James Bond lehkhabu hmasa ber leh khawvela James Bond a lo awm ṭanna pawh a ni. Ani hian James Bond thawnthu hi novel 11 leh thawnthu tawi pahnih a ziak bawk.
Ian Fleming thih hnu hian James Bond thawnthu hi midang pariat laiin an ziak leh tawh a ni. James Bond film hmasa ber chu kum 1962 khan tihchhuah a ni a, Dr. No tih niin Ian Fleming lehkhabu ziah Dr. No tih behchhana siam a ni. James Bond lema chang hmasa ber chu Sean Connery a ni a, kum 89 laia upa a ni tawh.
Sean Connery hian James Bond film paruk lai a chang a, George Lazenby khan pakhat a chang ve bawk. Mizo-te'na kan hriat lar em em Roger Moore khan James Bond role hi film pasarih laiah a play. Timothy Dalton khan pahnihah a chang ve a, Pierce Brosnan kha film paliah a inlan hnuin Daniel Craig hian a thlak leh a ni. Craig hian James Bond film pali a chang tawh a, No Time to Die hi a pangana tur a ni dawn.