CYMA-in Mizo infiamna entir

Nimin khan Chapchar Kut lawmna Lammualah ṭan a ni a, Central YMA hnuaia branch thlanchhuah 10-te'n Mizo infiamna an entir. CYMA president hlui leh CEC member Lalbiakzuala chuan Mizo nunze lanna pi leh pute  infiamna chu

ṭhangtharten an theihnghilh mai loh nan vawn nuna tihlar zel a ṭul thu Vanglaini a hrilh.

Mizo infiamna bika convener Lalbiakzuala chuan, "Kan hnam bik infiamna hi ṭhangtharte hian an ngaihhlut chhoh leh a ṭul hle. Hnam changkang apiangin mahni hnam nun phung an ngai hlu," tiin a sawi.

CYMA chuan Mizo infiamna entir tur hian Branch 10 a thlang chhuak a,  branch thlanchhuah Kulikawn (Inbuan), Tanhril (Insuknawr), Ramhlun Vengthar (Inkawihbah), Tuikual South (Saphîng pet), Chaltlang (In arpa thai/in ke pir), Sakawrtuichhun (In hrui zuan), Zemabawk (In suk herh), Khatla South (In arpa sual), Republic Veng (In kawi hnawk) leh Leitan (In ball vawm) ten infiamna pakhat ṭheuh an entir. 

Branch thlanchhuahte hi infiamna paruk tawlailir, kalchhet, ketaminu tlan, lirhbiang, sakuh ui lut leh zawnga leihlawn hmangin an inel a. Pakhatnaah pahnih awmin Chaltlang leh Zemabawk Branch YMA te an awm a, pahnihnaah Durtlang Leitan Branch YMA awmin Tanhril leh Tuikual South Branch YMA te chu pathumna ve ve an ni.