Mood Station 'Chawhpawlh Culture' ngaithla rawh le

Mood Station single thar 'Chawhpawlh Culture' chu Mood Station YouTube channel lamah thlira ngaihthlak theihin a awm ta.

'Rawn Sapatal Rawh' hitmaker, Lammual tuipui fawn tirtu Mood Station hian an hla thar hi Inrinni liam ta zanah khan an YouTube channel lamah an dah tawh a, rock music ngaina tan chuan ngaihven chi tak tur a ni. An single thar hi an vocalist/guitarist Tpa'n a buaipui deuh vek a ni a, recording, audio mix, mastering leh video shoot thlengin a kut chhuak vek a ni. 

Video shoot pawh a bei hautak lo khawp mai a, Samsung A20 wide angle-in a shoot tawp mai a ni. "Kan nihnaah (Mizo) chiang lo kan tam tawh, kei ngei pawh. Mahse a music chu eng pawh ni se, Mizo hla thu a nih chuan hnam dang zingah pawh a 'unique' ta nalh mai ṭhin. Hnam ropui bik an awm lo, hnam changkang bik an awm lo, hnam dang tumahin min chawi sang dawn lo, Mizo chauhin min chawi sang thei a ni. 

"Hnamdang entawn kan ni ve thei a, inrintawkna neih a pawimawh ber. Thiamna hi sumin a lei theih loh bawk, zir chhuah, nun chhuah pui chi a ni," tiin Tpa chuan an hla thar hmanga tarlan an tum chu Vanglaini a hrilh.