British-Irish Young Musician Rich List Adele khumtu Ed Sheeran a hausa ber

British national newspaper lar The Sunday Times chuan British-Irish singer leh songwriter zinga hausa zual a thlang chhuak leh ta a, Adele khumtu Ed Sheeran chuan dinhmun sang ber a luah. 

Adele hian nikum khan hausa ber dinhmun a lo luah tawh a, kuminah erawh Ed Sheeran a phak lo thung. 'Perfect' singer Ed Sheeran hausakna hi a let dawnin a pung a, tuma tluk rual a ni ta lo. 

Kum 28 mi Ed Sheeran hi tunlai zaithiam zingah chuan boruak nei lian berte zinga mi a ni a, sum pawh a lalut hnem hle. Kum khat chhungin pound maktaduai 80 zetin a hausak belh a, Young Musician Rich List-ah a sang fal hle. 

Sheeran hian Adele a khum a ni satliah lo - tuma tluk rual lohin a dinhmun a sawh nghet. Amah hnaih bertu Harry Styles hausakna chu £mtd 58 a nih laiin, Sheeran neih rohsum erawh £mtd 160 zet a ni. British singer ropui Ed Sheeran hian kum khat chhung lekin Harry Styles hausakna belh khawm aia tam a lalut a, hei hian a ropui zia a tarlang chiang hle. 

Young Musician Rich List-a pa­hnihna dinhmun luahtu Harry Styles hian nikum chhung khan £mtd 8 a lalut a, kum hmasa aiin a hausakna a pung hret. 'One Direction' star Harry Styles hi a bandmate ṭhin Niall Horan chuan a hnaih ber a, an sum neih zat pawh a inthlau lo hle. Niall Horan hausakna hi kum hmasa aiin £mtd 3 velin a pung a, a sum neih zawng zawng hi £mtd 49 a ni.

British girl group lar Little Mix-te chuan palina an hauh a, an hausakna belhkhawm chu £mtd 45 a tling. Louis Tomlinson  chu pangana a ni a, Liam Payne leh Zayn Malik-ten an dawt. Liam Payne hian £mtd 42 lai a nei tling a, Zayn Malik pawhin £mtd 36 vel zet a nei bawk. Sam Smith, Rita Ora leh Stormzy-te chu top 10-ah an lang bawk. 

English composer lar Lord Lloyd-Webber chuan a pumpuiah hausa ber nihna a hauh a, Sir Paul McCartney leh Nancy Shevell-te ai pawhin sum a ngah zawk. 

Lloyd-Webber hausakna belhkhawm hi £mtd 820 zet a tling a, kum khat chhunga a sum thawhchhuah pawh £mtd 80 zet a ni. Sir Paul McCartney leh a nupui Nancy Shevell-te hausakna belh­khawm chu £mtd 750 a ni a, a namai lo hle. 

Irish rock band chuai thei lo U2-te chuan tour aṭanga an sum lakluh hnem chhawr ṭangkaiin hausa ber pathumna an hauh a, £mtd 583 zet an nei. Sir Elton John chuan palina a hauh phak bawk a, a hausakna chu £mtd 320 a ni. 

Sir Mick Jagger, Keith Richards leh Olivia & Dhani Harrison-te chu a hausa zual zingah an lang bawk a, Sir Ringo Starr pawh a duai bik lo. Ringo Starr hausakna hi £mtd 240 vel a ni a, Michael Flatley leh Sting-te a khum a ni.