Zaimite leh rimawi lama tuimite tan MDM-in chak zawkin hma la dawn

Kum 2019-2020 chhunga Music Domain Mizo­ram (MDM) hruaitu turte chuan Ningani khan Whitestone Conference Hall, Ramhlun North-ah meeting an nei a, zaimite leh rimawi lama tuimite tana chak zawka hma lak an rel. 

MDM hruaitute hian rimawi ngainatute leh zai­miten kawng hrang hranga hma an sawn zelna tur an duang a, chak taka hma lak an tum a ni. An ruahman anga an kal thei a nih chuan Zoram mipuiin mit leh beng ngeiin a hlawhtlinna an hmu ngei ang tiin, beisei sang tak an neih thu an tarlang. 

MDM hian an din tirh aṭangin rimawi lama hma­sawnna turin hma an la a, an library-a in registe-te hnenah Rs. 30,00,000 chuang zet an sem tawh a ni. MDM member zinga hlawkna tel tam deuhte phei chuan thla khat chhungin Rs. 20,000, Rs. 30,000-te an dawng ṭhin a ni. MDM member zingah damlohna avanga damdawi-in awm an awmin medical bill Rs. 3,000 an pe ṭhin a, Mizoram pawna refer an awm chuan Rs. 5,000 an pe ṭhin bawk. 

Hetianga member-te’n hamṭhatna an hmuh ṭhin avang leh, an thil tum leh hmachhawpte an tih hlawhtlin ṭhin avangin nikum chhung pawh khan member 100 chuang zet an neih belh a ni. MDM Assembly 2019 chuan kumin aṭangin mem­ber-te’n neitu nihna an neih leh zual zawk theih nan membership fee pek nise tiin a rel a, July thla ral hmain pek tur a ni. Aizawl pawn lama awmte tan pawh pek dan tur an ruahman sak dawn a ni. MDM member ni mekte bakah, zai leh rimawi lam tui mi - Mizoram music industry hmasawnna atan ke pen duhte chu  member ni turin an sawm a ni.