Spider-Man screenwriter Alvin Sargent a thi

Spider-Man film screenwriter Alvin Sargent chu May 9, Ningani khan a chenna Seattle-ah a thi a, kum 92 mi a ni. Alvin Sargent thih thu hi a tirah puanzar a ni lo a, a thih chhan pawh 'natural causes' tia tarlan a ni. 

American screenwriter lar Alvin Sargent hian uitu a ngah hle a, a bikin Spider-Man film ngainatuten an ui zual ngei ang. Alvin Sargent hi Spider-Man film avangin a lar hle a, award pawh eng emaw zat a lo dawng tawh. Chung zingah chuan film khawvela award ngaihhlut ber Oscar pawh a tel a, ṭum hnih lai a lo dawng tawh a ni. 

Kum 1977 khan historical period drama 'Julia' a ziak a, Oscar award hmasa ber a dawng. Kum 1981 khan Ordinary People hmangin Oscar hi a hlawhchhuak leh bawk. Hollywood legend Alvin Sargent hi ṭum thum lai Oscar dawng thei tura chhawpchhuah zingah a tel a, Best Writing Adapted Screen­play award ṭum hnih a la.

Sargent hian sulhnu chhin­chhiah tlak tak tak eng emaw zat a hnutchhiah a, chung zingah chuan kum 2004-a tihchhuah Spider-Man 2 leh Spider-Man 3 (2007)-te pawh sawi hmaih chi an ni lo. Heng bakah hian The Ama­zing Spider-Man-te pawh a kut chhuak zinga langsar a ni bawk. 

Sargent hi American film producer Laura Ziskin nen hun eng emaw chen an inzui a, kum 2010 khan inneiin a kum lehah an inṭhen zui leh a ni.