Amtea music video thar 'Lunghlu'

Amtea chuan kumina a music video hmasa ber tur 'Lunghlu' chu a peihfel leh ta a, nizan khan Zonet-ah tihchhuah a ni. 

'Lunghlu' tih hla hi sap hla aṭanga lehlin a ni a, a satu Amtea hian Canadian Christian rock band Hawk Nelson hla 'Diamond' a lehlin a ni. Amtea hian nikum chhung khan music video eng emaw zat a tichhuak a, kuminah erawh a pakhatna a ni. Music track mawi tak hi Lal K Sailo kutchhuak a ni a, a kuthnu a nalh leh pek hle. Music video siam lama hnuhma nei ṭha berte zinga mi Andrew Lalbiakkima Ralte chuan video hi a siam sak a, en manhla tak a ni. Wardrobe hi Achhani Innovative Dresses a ni thung. 

Amtea chuan, "Ka hla ho hi a serious thei hlawm khawp mai a, tun ṭum chu hla hlimawm lam - Pathian faka mi zawng zawngin an lampui theih tur chhawpchhuah ve ka duh tawh a ni. A video pawh a hlimawm a, a hmuhnawm dawn bawk," tiin a music video chungchang Vanglaini a hrilh. 

A hla thu chungchang sawi zawmin, "Lalpa hian he hla hmanga min zirtir a tum ber chu, lunghlua min siam vek hi a ni. Lunghlu pawh mei alh sa tak hmangtein an buatsaih a, chutiang tho chuan Lalpa hian harsatna hrang hrang hmangin lunghlu mawi taka kan chhuah theih nan min buatsaih ṭhin a ni," a ti a, a dahsang hle. 

Amtea music video thar 'Lunghlu' hi MDM library-ah dahluh a ni a, Zonet leh MDM YouTube channel lamahte tihchhuah a ni ang.