Demi Lovato album thar turah Ariana Grande

Demi Lovato chuan a album thar tur, thlaleh maia tlangzarh a tum 'Dancing With the Devil... The Art of Starting Over'-a zaithiam a thawhpui zingah Ariana Grande a tel tih a sawi.

Kum 28 mi American singer hian The New York Times hnenah 'Positions' hitmaker nen an thawkdun dawn tih hi a hrilh a ni. Ariana pawhin Instagram story-ah hemi chungchang hi a sawi thawi a, hemi hnu hian Demi Lovato hian a rawn nem nghet ve leh thung.

A tleirawl chhuah tirh aṭanga khawvelin a hmelhriat tawh Demi Lovato hian studio album paruk a tichhuak tawh a, thlaleha tlangzarh a tum 'Dancing With the Devil... The Art of Starting Over' hi a studio album pasarihna tur niin kum 2017 hnu lama a album tihchhuah hmasa ber tur a ni a, track list la tichhuak lo mah se hla pathum awm tur chu a chiang tawh thung a ni.

Kum 2019 khan Ariana Grande leh Justin Bieber-te pawhin an thawhpui tawh ṭhin Scooter Braun nen inremna siamin a manager a nih thu a puang a, tuna a album thar tihchhuah tur hi Scooter Braun a thawhpui hnua a studio album hmasa ber tur a ni bawk.