TV-ah VSFS pe chhuak tawh dawn lo

Khawvela fashion show ropui ber ang hiala an sawi ṭhin, Victoria's Secret Fashion Show (VSFS) chu TV-ah pekchhuah a ni tawh dawn lo. 

Hemi chungchang hi tun hnai khan puan a ni a, TV lam aṭanga lo thlir hinte tan chuan kawng dang dap a ngai dawn ta a ni. Victoria's Secret Fashion Show hi nikum November thla khan New York-ah neih a ni a, hei hi network TV chuan an pe chhuak. Hemi ṭum hian Brazilian model Adriana Lima chuan a hun hnuhnung a hmang a, American model Gigi Hadid leh Bella Hadid-te chu a vawi thum nan an inlan thung. 

Kumin aṭang chuan TV lamah hmuh tur a awm tawh dawn lo a, social media lamah erawh en tur a awm zui zel dawn. Victoria’s Secret parent company, L Brands chief executive officer (CEO) Les Wexner chuan TV lama pekchhuah a nih tawh loh tur thu hi puangin, “Fashion hi sumdawnna pawimawh tak pakhat a ni a, TV lama pekchhuah hi a fuh ber loin kan hria. Hemi chungchang hi kan la ngaihtuah leh dawn a, hmasawnna turin theihtawp kan chhuah zui zel dawn a ni," tiin a sawi. 

Les Wexner chuan sawi zawmin,"Hmasawnna turin thil hrang hrang kan duang a, hmuhnawm zawk leh mipui hip leh zual turin ruahmanna kan siam a ni," tiin a sawi bawk. Victoria's Secret Fashion Show hi ABC chuan 2001 aṭang khan an pe chhuak a, live-a pekchhuah erawh a ni ngai lo. Show neih zawh hnu kar khatna velah tihchhuah ṭhin a ni a, mipuiin an hlut ṭhin hle. Mahse sumdawnna lam thil avangin pek chhuah zui a rem dawn ta lo a ni.