Rawngbawlna zau zawk a nih beiseiin Joseph-a'n YouTube channel a nei thar

Mizo mipa zaithiam zinga hriat hlawh ber pawl Joseph Zaihmingthanga chuan mipui ngenna leh zau zawka rawngbawlna a nih beiseiin YouTube channel a nei thar. 

Joseph-a hian May 14, Thawhlehni khan YouTube channel hi a peih fel a, English hla a cover pakhat chu en tur a awm tawh. Hemi chungchang hi sawiin, "Nikum lam aṭang tawh khan YouTube channel nei tura ngenna hi ka dawng tawh a, an ngenna hi zahawm pawh ka ti hle. Ngun taka ka ngaihtuah hnu­ah, rawngbawlna peng pawimawh tak pakhat a nih beiseiin ka tihlawh­tling ve ta a ni," a ti. 

Synod Revival spea­ker Joseph-a chuan, "Hmun hrang hrangah Pathian rawngbawlin kan feh chhuak a, chungte chu a duh apiangin an en theih nan a ṭangkai dawn hle a ni. Zaia rawngbawlna piah lamah sermon leh infuihna thu ṭha tak tak thlengin chhawpchhuah ka tum a ni," tiin Vanglaini a hrilh. Ṭhalaite zinga rawngbawlna an neih nasat thu sawiin, mi tam zawkin an lo ṭangkaipui theih beiseia channel nei a nih thu a sawi bawk. 

A official YouTube channel hi 'Joseph Zaia' tih a ni a, subscriber pawh an pung chho ve hret hret. A channel kaltlang hian English hla a cover hrang hrangte upload phawt a tum a, zawi zawiin huang a zauh chho dawn a ni. A hla dahchuah hmasak ber hi 'Nobody Can Save Me' tih a ni a, viewer pawh an tam chak hle.