MTV Movie & TV Award nominee puan a ni ta

Kumtina sem ṭhin MTV Movie & TV Award chu June thla hian sem a ni leh dawn a, nominee pawh Thawhlehni khan puan a ni. 

Award dawng thei tura chhawp­chhuahte hi an hrawl hle a, Aven­gers: Endgame leh Game of Thrones (GoT) te an ni nawk. Avengers hi Best Movie award la thei turin a dinhmun a ṭha he a, Spider-Man: Into the Spider-Verse nen an buk a rit hle dawn a ni. Hetih lai hian GoT chu Best Show atan thlan nahawm ber a ni a, Big Mouth, Riverdale, Schitt’s Creek leh The Haunting of Hill House-te nen an inel dawn a ni. 

Best Performance in Movie category-ah Lady Gaga, Rami Malek leh Sandra Bullock-te chu mipui ngaihven an ni. A Star is Born leh Bohemian Rhapsody lar zia sawi nawn a ngai lo, Lady Gaga leh Rami Malek-te tan award a hnai. Chutih rual chuan 'Bird Box' star Sandra Bullock pawh dahbo ngawt theih a ni lo. 

Best Hero huangah 'Captain Marvel' star Brie Larson chu hming langsar ber a ni a, award dawng tur pawhin a khan hle. Chutih rual chuan - John David Washington, Maisie Williams, Robert Downey Jr. leh Zachary Levi-te an awm ve bawk avangin a ngaihnawm dawn. 

MTV Movie & TV Award hi June 18 khian Los Angeles, California-ah sem a ni dawn a, American actor Zachary Levi chuan a host dawn a ni.