Rosy K. Remsangpuii A nau boral ta pualin 'The reason' a cover

Mizo singer hriat hlawh berte zinga mi Rosy K. Remsangpuii chuan a nau boral ta, Glory K. Zothanpuia pualin Calum Scott hla 'The reason' a cover a, nimin khan a YouTube chennel kaltlangin a tichhuak. 

Glory K. Zothanpuia hi May 18, 2017 khan a boral a, vawiin hi a thihchampha a ni. He hun a lo thlen hian Rosy-i hian a nau tan hian tih theih a nei tam lo tih a hria, amaherawhchu eng emaw tak tih a duh si avangin 'The reason' hi a cover sak ta a ni.

Rosy-i chuan, "A hre­awm ka ti khawp mai, ka nau tan hian tih theih ka nei tawh si lo a - he hla hi amah hriatreng nan ka hlan a ni. A hla thu hi ka duh em em a, Glory tan liau liau ka hlan e," tiin, 'The reason' a cover chhan a sawi. 

'The reason' hi zai­thiam eng emaw zatin an lo cover tawh a, Rosy-i aia sa nalh erawh sawi tur an tam vak lo mai thei! A aw nen a inmil em em a, a zai thiam zia hmuh hmaih chi rual a ni lo. 

YouTube channel
Instagram lamah chuan 'rosy_the_singer' tiin a lar em em a, follower pawh a ngah hle. YouTube lamah erawh channel a lo la nei hauh lo a, 'The reason' a cover chu remchangah lain channel pawh a nei thar ve ta a ni. 

Rosy-i hian sap hla a tam thei ang ber cover a tum a, chungte chu a channel 'Rosy The Singer' lamah hmuh leh ngaihthlak tur a awm chho deuh mawlh mawlh dawn a ni. A channel hi a la tharlam hle a, subscribe-a like sak turin mipui a sawm bawk.        Sawmna duhawm

Rosy-i zaithiam zia sawi nawn a ngai lo, Zoram dung leh vang a deng chhuak. Hei mai hi a ni lo - hmun hrang hrang aṭangin sawmna duhawm tak tak a dawng. Social media kaltlangin mi tam takin an lo hmelhriat a, Bollywood lam aṭang pawhin sawmna a dawng hial. Amitabh Bachchan leh Taapsee Pannu-te channa Bollywood film 'PINK'-ah khan zai tura sawmna a dawng a, demo pawh an thawn thlap. Amaherawhchu Bollywood lam hian an hre chhuak har hret a, hun a tepter avangin an puitlin thei ta lo a ni. Mizo zingah hetianga sawmna dawng an awm hi chanchin lawmawm tak  a ni tho.  

Khawvela ram ropui ber US-a a zin ṭumin sawmna duhawm tak a lo dawng tawh bawk a, sap hoin an band-a vocalist turin an sawm. Hetianga sawmna hi a dawng zauh zauh ṭhin a, amaherawhchu Mizoram a chhuahsan hlei thei rih lo a ni. Rosy K Remsangpuii hian music video mumal tak a la nei meuh lo a, chuti chung chuan a lar em em lawi si. India ram hmun hrang hrang bakah - South Africa, Malaysia, Burma, USA leh Bangladesh thlengin zaiin a lo feh chhuak tawh ṭhin a, sawmna pawh a la dawng mek zel bawk. 

Best Female Artist atan ṭum nga zet thlan a lo ni tawh a, hei hian a talent neih ṭhat zia leh mipuiin a zai an ngainat zia a tarlang chiang hle a ni.