Rosé-i'n ‘On The Ground’ hmangin record a siam

BLACKPINK Rosé chuan a single thar ‘On The Ground’ hmangin YouTube-ah record a siam.

Korean-Australian singer hian PSY-in kum 2012-a 'Gangnam Style' hmanga record a lo siam tawh chu khumin  solo K-pop artist zinga darkar 24 chhunga YouTube-a a music video thlirtu ngah ber record a siam a, darkar 24 chhungin thlirtu maktaduai 41.6 a nei hman a ni.

PSY chuan kum 2012 khan he record hi lo siam tawhin a single hit 'Gangnam Style' kha darkar 24 chhungin thlirtu maktaduai 36 a nei thung.

‘On The Ground’ hi Rosé’s official music video hmasa ber a nih bakah a single project hmasa ber 'R'-a a dah tel a ni a, kar hmasa Zirtawpni khan tlangzarhin Nilaini khan The Tonight Show Starring Jimmy Fallon-ah a inlan bawk a, K-Pop solo artist zinga The Tonight Show-a inlan hmasa ber a ni bawk. Group ang chuan nikum lamah Blackpink-a a ṭhiante nen an lo inlan ho tawh a ni.