Justin Bieber album Justice-in mi dang trademark a hmang?

French electronic dance duo Justice chuan Justin Bieber album thar, Justice logo chu sawiselin, Justice tih a ziahna laia 'cross T' chu an mahni a copy niin an sawi a, hei hi dan kalh niin, he cross T-ah hian trademark an neih hmasak zawk thu an tarlang. 

Hemi chungchangah hian Justin Bieber hnenah hian Dance duo Justice chuan lehkha thawnin, an phalna loa Justice tih inziaka an trademark ang cross T hman chu an rem ti lo a ni tih an hrilh. Justice manager chuan an lehkha thawn hi Justin Bieber team chuan an ngaih pawimawhsak loh thu leh an trademark pawh an ngaih pawimawhsak lo niin a sawi.

French record label Ed Banger Records founder, Pedro Winter chuan Bieber album logo hi March 1 khan French electronic dance duo Justice nen a in an deuh avangin a lo sawisel tawh a, hemi hnu March 18 khan French electronic dance duo Justice-te chuan Bieber logo hman hi dan dik loa hmang a nih thu an rawn tarlang zui ve leh ta a ni.

Justin Bieber-a'n a album thar a tlangzarh 
Naupang a nih aṭanga mite hriat hlawh kum 27 mi Justin Bieber chuan nimin chaw hma lam khan a album parukna tur 'Justice' chu a tlangzarh ta.

He album thar hi nikuma a tlangzarh tak 'Changes' album chhunzawmna a ni. A album tharah hian hla 16 a awm a, Chance the Rapper nen an thawhdunna 'Holy' chu a album thara a hla lar ber zinga mi niin, a naupan lai mila hla a siam 'Lonely' pawh a tichhuak tawh a, kumin kumtir lama a tihchhuah 'Anyone' chu a album thar zinga lar sa a ni bawk.  

Album thar a tihchhuah rual hian nimin vek khan Bieber hian Daniel Caesar leh Giveon a thawhpuina hla 'Peaches' chu a music video nen a tichhuak nghal a ni. Nikum February khan Bieber hian a album 'Changes' chu tichhuakin, Covid-19 hri lengin a nan zui avangin, Changes album hi world tour pawh a neih pui hman lo a ni.