Mystical Mizoram Ṭhazual GOSPEL Cindy Lalthanpuii 'Ngawlveite Inhlanna' pakhatna a ni

Mystical Mizoram Ṭhazual Gospel chart-ah Cindy Lalthanpuii 'Ngawlveite inhlanna' chu pakhatna a ni a, Maruati 'Zual Zelin' chu pahnihna niin Ruthi Zonunsangi     'Ka Awm Angin' chu pathumna a ni.
'Ngawlveite Inhlanna'
'Ngawlveite Inhlanna' hla hi hla thar a ni lo tih kan hre ṭheuh a, Ṭhazual chart-a mikhual lo tak Cindy Lalthanpuii hian nikum kum tawp lamah khan a rawn thar thawh leh a, Mizote'n kan lo la ngaithla kham lo nasa tih a hriat a, Cindy zai kan ngaina tlang tih a hriat bawk.
Thla li chhung vel lekin YouTube-ah thlirtu nuai chuang a nei tawh. Cindy hian a aw ngaihno bei tak a hmang thiam bawk a, RTC Lalduhawmi hla Mizote'n kan ngainat tak hi, 'Ngawlveite Inhlanna' hla hi a sa mawiin a sa lungkuai thiam hle a, pakhatna a ni pawh hi a phu viau a ni.
Maruati leh Ruthi
Maruati hla hit 'Zual Zelin' chu pahnihnaah a rawn inhlangkai ve bawk a, chart hmasaah khan pathumna niin dinhmun ṭha lehzualah a rawn ding ta a, chart topper a ni thei dawn em tih hriat a chakawm tawh viau mai.
Ruthi Zonunsangi 'Ka Awm Angin' pawhin hma a sawn zel a, tunah chuan pathumnaah a rawn inhlangkai ve leh ta bawk a ni.
Ṭhazual chart top 5-te chu...
One In Christ hla ngaihthlak hlawh tak 'Lalpa Ṭhatna' chu palinaah a inhlangkai a, PC Lalrinliani    chuan 'I Lam Kan Lo Hawi' hmangin top 5 a khar thung.