GIG Motors Ṭhazual Fakna Stacy VL Muanpuii a inlar leh ta

'Thlen ka nghakhlel' tih hla hmangin Ṭhazual Fakna chart-ah dinhmun sang ber a lo luah tawh a, a hla thar ‘I rinawm ropuizia’ hmangin No.1 a hauh leh ta. Stacy VL Muanpuii hian hun eng emaw chen hla thar a neih loh hnuah nikum October thla aṭang khan a rawn inlar leh ṭan a, a album ami tur single pahnih a tichhuak. October-ah 'Thlen ka nghakhlel' a tichhuak a, kumin April thla khan ‘I rinawm ropuizia’ a tichhuak leh bawk. ‘I rinawm ropuizia’ tih hla hi sap hla lehlin a ni a, Lalrammawia leh Vanneihtluanga-te'n Chris Rice hla 'Great Is Thy Faithfulness' an lehlin a ni. Soundtrack leh music arrange­­ment hi Muanpuia Renthlei kutchhuak a ni a, audio hi Bluewave Records a ni thung. Video hi Siama (SVP) kutchhuak a ni a, a zai thiam piah lamah video a hmuhnawm tel a, dinhmun sang ber a luah hi a mak lo. He hlaah hian Backing vocal an awm a, Nunui Chhangte, Abe-a, Famkima (FK-a) leh Hlimhlimi-te'n an pui a ni. Stacy hian a album thar tur 'Lal Chawimawina' tih chu a buaipui mek a, kumin chhungin release hman a beisei a ni. Tun ṭumah hian Mawitei Ralte chuan 'Lalpa min vengtu' tih hla hmangin pahnihna a hauh a, Zela Chuaungo chu top 3-ah a inhamtang bawk. Luangmual tlangval Zela hian a hla thulkhung 'Lunghlu' tih hla hmang hian a zawnin No.1 a lo hauh tawh a ni. Sawmtea Chhangte chuan 'Thlarau mitmengin' tih hla hmangin palina dinhmun a luah a, Arini, Cindy & Zorina-te chu panganaah an awm. 'Praise On' star-te hian tun hnaiah music video 'Nunna thar' an tichhuak a, a hit nghal rem rem hle. He hla hi tunlai fakna hla hriat hlawh leh lar berte zinga mi a ni a, an zai thiam em avangin chart-ah pawh an lang chho deuh mawlh mawlhin a rinawm. Champhai nula H. Lalrem­ruati chuan 'Mawi tawp berin' tih hla a hlawhtlinpui zui zel a, Sanga Renthlei, Andrew K. Lalchhandama, Lalrinfela Tlau leh Lalthlengliani-te chu top 10-ah an lang bawk.