Eurovision 2019 Netherlands an champion

European Broad­casting Union (EBU) member ramte tan inelna Eurovision Song Contest 2019 chu zawhfel a ni ta a, Netherlands an champion. Italy chu point 465 hmuin pahnihna an ni a, Russia (369 point) chu pathumna an ni. Kum 25 mi Duncan Laurence chuan Britain lakah an ram hi hnehna a chanpui a, 1975 hnua a vawi khat nan Eurovision-ah an champion leh ta a ni. Dutch singer Dun­can Laurence hian final-ah hian 'Arcade' tih hla a sa a, point 492 hmuin a champion a ni. Netherlands hi 1975 khan winner an lo ni tawh a, kum 44 hnuah an champion leh thei chauh a ni.  Hetih lai hian X-Factor contestant hlui Michael Rice chuan Britain tan thil ropui a lan tir thei lo a, a mawngphahah an awm. U.K hi kum 16 chhungin ṭum li zet a mawngphahah an awm tawh a, an ropui thei lo.  Final-ah hian nikum lama pakhatna Netta (Israel) chu a perform a, American singer ropui Madonna a che pui rem rem hle bawk. 'Queen of Pop' Madonna hian 'Like A Prayer' a perform a, a incheina chuan mit a la hle. Ṭum dang ang bawkin a che vel a hmuhnawm a, a mikhual lo tak zet.Kum 60 mi lai ni ve tawh Madonna hi American rapper Quavo nena an hla thar 'Future' an perform bawk a, mipui lawm an hlawh hle. Eurovision Song Contest Grand Finale-ah hian Madonna dancer pahnihte chuan Israel leh Palestine inkarah remna leh muanna awm se an duh zia lantir nan flag an keng a ni. Hemi chungchang hi Madonna chuan sawiin, "Israel leh Palestine-te inkarah hian remna leh muanna a awm theih nan hma lak zel a ngai a, kan thlawp zia lan tir nana ti kan ni," tiin a sawi. Eurovision Song Con­test hi Tel Aviv Fairg­rounds, Tel Aviv-Yafo, Israel-ah neih a ni a, final-ah hian ram 20 an inlan a ni.