Ben Affleck thlaktu tur Robert Pattinson

British actor lar Robert Pattinson chu Batman film-ah kan hmu dawn a nih hmel a, Ben Affleck hmun ruak a luah dawn tih khawthlang media-te chuan an tarlang. American actor Ben Affleck hi Batman film chhuak thar leh turah hian a inlan tawh dawn lo a, a aiah Robert Pattinson a inlan ve thung dawn a ni. Batman thar hi 2021 June thla velah a chhuak dawn a, American film director Matt Reeves chuan a buaipui leh mek a ni. Kum 33 mi Robert Pattinson inlan tur thu hi tunhnai khan puan a ni a, fan ṭhenkhat an lawm viau laiin, Ben Affleck lam ṭangte tan erawh thu hriat nuam tak a ni lo thung. Kum 46 mi Ben Affleck hi kum tir lam pawh khan a inlan tawh dawn lo nia sawi a lo awm tawh a, tunah chuan engkim a chiang ta a ni. Affleck hi DC Extended Universe (DCEU)-ah a vawi khat nan 2006 khan Batman v Superman: Dawn of Justice-ah a inlan a, Suicide Squad leh Justice League-ahte a lo chang tawh bawk.