Scarlett leh Colin an inhual

American actress Scarlett Johansson leh comedian Colin Jost-te chu kum hnih an inzui hnuah an inhual ve leh ta. Kum 34 mi Scarlett Johansson leh 'Saturday Night Live' star Colin Jost (36)-te inhual thu hi Johansson thupuangtu Marcel Pariseau chuan Pathian­ni khan The Asso­ciated Press a hrilh a, an inneih hun tur erawh a la tarlang lo. Hetih rual hian inneih thuai erawh an tum tih a sawi. 'Avengers : Endgame' star Johansson hian pasal ṭum hnih a lo nei tawh a, a vawi thumna tur a hual leh ta a ni. Canadian actor lar Ryan Reynolds nen kum 2008 khan an innei a, kum li hnuah an inṭhen leh. Kum 2014 khan French journalist Romain Dauriac nen an inkutsuih leh a, rei erawh an daih leh ta chuang lo. Dauriac nen hian 2017 khan an inṭhen a, fanu pakhat an nei hman a ni. An inṭhen hnu lawk July 2017 aṭangin Colin Jost nen hian an inkawp chho ve leh a, inneih zai an rel ve leh ṭan ta a ni.