Hla thlanna programme thar ZONET ZÛN THAR

ZONET lamah zaithiam hrang hrang zai i thlang thei ta. Chung i hla thlante chu Inrinni zanah tih chhuah ṭhin a ni ang. I ṭhiante, i chhungte leh i ngaihzawngte emaw, i duhsak zawngte tan emaw hla i thlansak theihna tur programme thar Zonet chuan an buatsaih sak che a, lo inring rawh le.He programme hi 'Zonet Zûn Thar' tih a ni a, hla thlanna programme tawp a ni a, a bênglut hle turah beisei ang.

Social Media kaltlangin aw..

Mizote hian hla thlan dan chi hrang hrang kan hmelhriat nual tawh. Tunhma deuh kha chuan lehkhathawn ang deuhte khan thehluh a ni ṭhin a, khawvel a changkang zel a, telephone hmangin a thlan theih leh a. Mobile phone chhuah chinah chuan a changkang leh hret a, SMS hmangin a thlan theih leh a, chutiang chuan hla hi kawng hrang hranga thlan a lo ni tawh ṭhin.Tun ṭuma Zonet programme thar erawh hi chu Social Media kaltlanga thlan tur a ni thung. Zonet chuan an Facebook leh Instagram lamah hla thlanna post an rawn siam ṭhin dawn a, kar tin Thawhlehniah post hi an rawn siam ṭhin ang. Kan hla thlante chu Ningani ral hmain thehlut tur a ni. 

A thlan dan tur chu

Post an rawn siamah chuan kan hla duhzawng kha comment hmangin thlan mai tur a ni ang. Artist hming, a hla sak leh thlan chhan kha ziah mai tur a ni. Artist hming ziahnaah an profile mention pawh pawm a ni bawk.

Entirna atan:- ARTIST: ------  HLA: ----- THLANCHHAN: -----Hla thlangtute profile hming puan leh tarlan ṭhin a ni a dawn a, hla thlan chhan erawh a remchan dana puan ṭhin a ni ang. Profile pakhatin hla pakhat chauh a thlang ṭhin tur a ni a, pakhat aia tam a thlang a nih chuan a thlan hmasak ber chauh chhiar a ni ang.

Chutichuan.....

Hla, thlan hlawh ber sawm (10) thlan chhuah tur a ni a, Gospel-ah panga (5) leh Lengzem/Lenglawng panga (5) thlan chhuah tur a ni dawn a, chung thlan hlawh zual 10-te chu Inrinni zanah an tichhuak ṭhin dawn a ni.A hmasa ber atan chuan January leh February 2021-a MDM-a register hlate aṭangin hla hi thlan tur a ni a, Zonet lamin chung hlate chu chiang zawkin an tarlang a, an social media acoount lamah a bih chian theih reng.Tunah hian hla hi a thlan theih reng tawh a, Zonet lam chuan nimin khan a hmasa ber atan post an siam tawh a ni.