Freddie Mercury hming chawiin London-a kawtthler pakhat hming an sa

British rock band Queen vocalist fam ta Freddie Mercury hming chawiin London-a kawtthler pakhat hming an sa. London khaw thlang lama awm Feltham khuaa kawtthler pakhat chu 'Freddie Mercury Close' tiin an hming an sa a ni. 

Freddie Mercury Close hi Feltham khuaa Hanworth Road-a kawtthler pakhat a ni a, tualchhung thuneitute remtihnain kawtthler hming hi an sa a ni. Feltham khuaah hian World Zoroastrian Orga­ni­zation headquarters-a awm a, Freddie kha a nau­pang tet aṭanga  Zoroas­trian sa­khaw vuantu a ni bawk.

Freddie Mercury kha  Stone Town, Zanzibar (Tuna Tanzania ram chhunga awm ta)-a piang a ni a, a naupan lai hun tam zawk erawh India-ah hmangin school-te a kal ṭhin a; kum 1963 khan Zanzibar-ah hian a let leh chauh a ni.

Sultan of Zanzibar laka helna a chhuah a, Arab leh India mi tam tak thah an nih avang khan Feltham khuaah hian Freddie Mercury-te chhung hi kum 1964 khan an pema, 22 Gladstone Avenue vengah an chhungkuain an khawsa a. Freddie hian a tleirawl hun a hmanna ber pawh he khua hi a ni a, hemi a nih avang hian a hming chawia kawtthler hming an sa pawh hi a inhmeh hle.

Freddie Mercury hi kum 1991 khan kum 45 mi niin AIDS vangin a thi a, khawvela HIV leh AIDS do rem a nih theih nan a thih hnu hian a hmingchawiin Mercury Phoenix Trust din a ni bawk.