'The Voice' Season 16 winner Maelyn Jarmon

The Voice Season 16 chu nimin zingah khan zawhfel a ni ta a, John Legend-a team-in hnehna changin, Maelyn Jarmon chu winner a ni. Kum 24 mi Maelyn Jarmon hian a elpui Gyth Rigdon, Dexter Roberts leh Andrew Sevener-te a khum a, mi bik a nih zia a pholang.  Blake Shelton-a team aṭangin Gyth Rigdon chuan pahnihna a hauh a, Dexter Roberts leh Andrew Sevener-te'n pathumna leh palina an hauh ve bawk. 

Team Legend
The Voice-ah hian judge-te'n team an nei a, grand finale-ah hian John Legend leh Blake Shelton-a team-te an inel a ni. Judge-te hi costestant-te coach an ni nghal a, John Legend chuan a vawi khat nan winner a chher chhuak a ni. The Voice Season 16 winner Maelyn Jarmon chuan, "John Legend hian fak a phu a, hnehna ka chan theih nana mi pawimawh tak a ni. Ani kaihhruaina hnuaiah hian nasa takin hma ka sawn a, tun hun hi ka thleng ta a ni," tiin, a coach John Legend a fak. John Legend-a nupui Chrissy Teigen pawhin,"Tun ang reng renga John-a hlim hmel hi ka la hmu ngai lo," tiin a pasal hun tawn a lo sawi ve mek bawk. 

Ri hriatna ṭha lo...
The Voice winner Maelyn Jarmon hian ri hriatna kawngah harsatna a nei a, a beng lehlamin ri a hre lo. Heti chung hian a beidawng duh lo a, khawvel hriatah a inphochhuak ta a ni. Kum hnih mi lek a nih laiin a beng lamah harsatna a tawk ṭan a, vanduai thlak takin a beng ding lam chu a ngawng zui ta a ni. A beng vei lam pawh ri hriat kawngah a chak tawk lo bawk. Texas-a cheng Maelyn Jarmon hi rimawi lamah a tui hle a, ri hriat kawnga a chak lohna chuan beidawn a hnekin tum ruhna a pe. Kum 5 mi lek a nihin theater-ah a perform ṭan der tawh a, kum 13 a tlin rualin music lamah a zuanglut ta chawt a ni. Beidawng duh loMaelyn Jarmon hi kum 2012 khan American Idol-ah a inlan a, hetih lai hian kum 16 mi chauh a la ni. American Idol-ah hian first round paltlang zo loin a tla a, a hrilhhai thlak khawp ang le. Amaherawhchu The Voice-ah a tumruhna leh thawrimna chu a parchhuak ta a, a chanchin ngaihnawm tak chu hahipin an sawi ta zawk a ni.  Maelyn chuan, "Ri hriat kawngah harsatna ka tawh avangin ka zinkawng hi a hautak em em a, min puih duh em emtute nen pawh inbiak fuh loh chang kan nei a - beidawn rum rum chang pawh a awm fo mai. Amaherawhchu a tawpah chuan thawhrimna chuan tun hun hi min hruai thleng ta a ni," a ti. Maelyn hian kum 17 mi a nihin a agent kaltlangin contract a sign a, New York lamah a inbengbel. Kum 18 a tlinin Iranian-Canadian singer Ramin Karimloo nen tour an nei a, music industry-a a zinkawng chu a zawh chho ta tak tak a ni. Kum 2016 khan 'Last Call' music video a tichhuak a, a kum lehah 'Ayo' a tichhuak leh bawk. Tute nge perform?The Voice grand finale-ah hian Korean boy band BTS-te an perform a, lawm an hlawh hle. An vawi khat perform-naah hian J-Hope, V, Jungkook, Jimin, Suga, Jin leh RM-te hian an hla hit 'Boy With Luv' leh 'Love'-te an sa a, mipui thawm a ring hle. Jonas Brothers-te'n mipui hmaa inlanna hun remchang bawlhpelh loin final tihlawhtlingtu zingah an tel.  Joe, Nick leh Kevin-te hian an hla thar 'Cool' an sa a, stage an luah lum ṭha hle. Taylor Swift leh Brendon Urie-te chuan an hla thar 'Me' an perform bawk a, an chevel a hmuhnawm lehpek hle. The Voice Season 16 finalist Andrew Sevener chu a idol, Travis Tritt nen an inlan dun a, midang eng emaw zat an perform bawk.