Johnny Depp leh Amber Heard an inpuh tawn

Kum hnih chuang awrh chauh an innei a, chanchin chhe lam sawi tur erawh an ngah dun hle! Hollywood star Johnny Depp leh Amber Heard-te chuan thiamchang zawk nih tumin an inpuh chhe tawn a, an chanchin hian ngaihven a hlawh thar hle. 

American actor Johnny Depp chuan a nupui hlui Amber Heard chu amah tihmualpho tuma cheah puhin defamation case a file a, $mtd 50 chawi turin a phut hem mai. Kum 55 mi Depp chuan Amber hian media kaltlangin dik lo takin a puh tih a sawi a, hei vang hian a khinglet ve ta tih a sawi. Kum 33 mi Amber hian a pasal hlui hian nasa takin a nghaisa ṭhin tih Washington Post a hrilh a, hei hi nikum December khan tihchhuah a ni. Hei hian Depp rilru a hliam a, amah tihmualpho tuma cheah a puh let ve ta thung a ni. 

American film star Johnny Depp leh Amber Heard-te hi kum 2011 a-ṭang khan an inzui ṭan a, 2015 khan Los Angeles-ah an inkutsuih a - 2017 khan an inṭhen leh nghal a ni.