Billboard Global Chart pahniha roreltu Rosé

BLACKPINK member Rosé-i single thar 'On the Ground' chuan YouTube lamah record duhawm tak tak a siam hnuah Billboard chart lamah pawh a par rimtui a chhuah thei tih lantirin, Billboard Global 200 leh Billboard Global Excl. U.S. chart-ahte a rualin topper a ni ve ve.

Thla ruk vel liam taah khan Global Excl. U.S chart-ah hian 'Lovesick Girls' hmangin a bandmate-te nen topper an lo ni ho tawh a, tunah mimalin chart topper a nih leh takah hian he chart bikah hian group leh mimal anga topper ni ve ve thei artist awmchhun a la ni.'On the Ground' hi March 12-a a tlangzarh kha niin YouTube lamah chuan Korean solo artist, darkar 24 chhunga thlirtu ngah ber record leh Korean hmeichhe solo artist thlirtu maktaduai 100 nei rang ber record a siam tawh bawk.

Billboard Global Chart pahnih hi nikum September thla aṭanga an siam thar chauh kha a ni a, ram hrang hrang 200 vel zeta hla an stream dan leh an lei dan MRC Data-in a lakkhawm aṭangin chart hi an siam a ni.

Kar 10 chhung Morgan Wallen-in Album chart-ah ro a rel ta
Morgan Wallen 'Dangerous: The Double Album' chu US-ah chuan album hralh kal ber a la ni zel a, Billboard 200 chart-ah a zawnin kar 10 chhung pakhatna a ni ta.January 23 aṭang khan chart topper hi a ni ṭan a, tunah pawh a la nih chhunzawm ta zel a ni.

A zawna kar 10 chhung chart topper ni thei hi an la tam lo a, kum 1987 hnua hetiang record siam leh thei hmasa ber chu Morgan Wallen hi niin, Drake-a album 'View' kha kar 13 lai chart topper ni mah se a zawnin a ni lo a ni.Chart tharah erawh Justin Bieber 'Justice' leh Lana Del Rey album tharte nen an inel a ngai tawh dawn a, a dinhmun ṭha hi a derthawng ve deuh tawh mai thei.

Hot 100 leh Artist 100 lam
Billboard Hot 100 lamah chuan Cardi B 'Up' pakhatna a ni a, Bruno Mars leh Anderson Paak-te hla dangdai tak 'Leave The Door Open' chu pahnihna niin Olivia Rodrigo 'Drivers License' chu pathumna a ni thung. Artist 100-ah chuan The Weeknd pakhatna a ni a, Drake chu pahnihna niin BTS chu pathumna an ni bawk.