Green Day leh BTS-in An tour an ṭhulh Italy-a Mi:7 production titawp

Wuhan, China aṭanga khawvel hmun hrang hranga hri darh mek chuan buaina a thlen belchhah zel a, technology company hrang hrang a nghawng mai bakah entertainment company lamah pawh nghawng a nei nasa hle. Mi tam takin nunna an chan mek zel bawk a, Asia ram mai ni lo, khawvel hmundangah a darh zel avangin fimkhur thil thuah programme pawimawh tak tak ṭhulh pawh a tam tawh hle a ni.

Venice, Italy-a shoo­ting neih tur Mission: Impossible 7 chu an chawl rih bawk. Tom Cruise-a leh a ṭhiante hian shooting hi an nei theih rih dawn lo a ni.

Italy sorkar chuan mipui punkhawm a khap thu a tarlan tak avangin Mi:7 pawh hi chan theih a ni rih dawn lo. Hemi avang hian shooting neihna tur hmun dang an dap leh tawh niin Deadline chuan a tarlang.

Italy-ah hian Thawhṭanni thleng khan Covid-19 kai hi mi 200 an awm tawh a, pasarihin an thih phah tawh bawk.

Punk rock legend Green Day chuan Covid-19 darh zel vang hian thla thar tir  aṭanga an ṭan tur Asia Tour chu tihkhawtlai a nih thu an sawi.

An instagram page-ah hemi chungchang hi tarlangin coronovirus vangin Asia-a an show an ṭhul a ngai chu pawi an tih thu leh thutlukna siam harsa tak a nih thu an tarlang. Ticket lei tawhte chu an ticket lo la kawl ṭha tura chah zuiin tour hun tur thar an puanchhuah leh vat tur thu an tarlang a ni.

Rock and Roll Hall of Famers trio-te hian an album thar ber  "Father of All..." tihlarna turin tour hi neih an tum a, March 8 hian  Singapore Indoor Stadium-ah Asia tour bulṭan an tum a; Thailand, Philippines, Taiwan, Hong Kong, South Korea leh Japan-te pawh tlawh an tum bawk.