Ed Sheeran hla thar 'Cross Me'

Candian singer Justin Bieber nen 'I Don’t Care' an tihchhuah hnu lawkah Ed Sheeran a inlar zui leh nghal a, nimin khan 'Cross Me' lyrics video a tichhuak. 

British pop star Ed Sheeran hian 'Cross Me' hi a lyrics video chauh a tichhuak a, official video chu nghah deuh a la ngai dawn a ni. Lyrics video hi YouTube lamah upload a ni a, viewer pawh an pung chak hle. A hla tharah hian Chance the Rapper leh PnB Rock te a thawhpui a,  ngaihthlak manhla tak leh sakpui nuam tak chi a ni. 

Ed Sheeran hian Fred a thawhpui leh a, ani hi JB-a nena an hla 'I Don’t Care' ah khan an lo thawhpui tawh bawk a ni. 'Thinking Out Loud' singer Ed Sheeran hian a studio album palina tur a buaipui mek bawk a, he album-ah hian - Cross Me leh I Don’t Care te pawh hi a tel dawn a,  hla dang 13 vel awm bawk tura beisei a ni a, July 12 hian a tichhuak dawn a ni.