Zo Ri-mawi International Rising Day cum Charity Awareness hmang

Zo Ri-mawi International (charity group) chuan an din­cham vawi 6-na chu Ningani khan Mamawii Higher Secon­dary School Hall-ah zirlaite nen an hmang a, charity awareness hlawhtling takin an nei nghal bawk.

Zo Ri-mawi International Rising Day hi Mizo Zaimi Inzawmkhawm (MZI) president David Z Hmar chuan a hmanpui a, school naupang leh zirtirtute nen hun hlimawm tak an hmang ho a ni. 

Lelte Weekly editor C. Din­thanga chuan he hun hi a hmanpui bawk a, F. Lalmuanpuia, Luang­mual hnenah Charity Best Performance Award a hlan a ni. He chawimawina hian citation leh trophy bakah sum fai Rs. 5,000 a keng tel. C. Dina chuan charity-ah hian suma inṭanpui ringawt ni loin, inhmangaih tawnna leh induhsakna te pawh hi a tel vek a ni a ti a, Zo Ri-mawi International hmalakna chu Pathian duhzawng tak a nih thu a sawi bawk.

Zo Ri-mawi International hian an Rising Day pual hian naupang vanduaina tawk, electric-in a man Remruatfela, Bawngkawn chu Rs. 5,000 in an ṭanpui a, Civil Hospital Naupang Ward-a naupang eng emaw zat ṭanpuina an hlan bawk.